કોલકાતા:  પશ્ચિમ બંગાળમાં નંદીગ્રામ અને રાજનગરની મહત્વપૂર્ણ પેટાચૂંટણીઓ પહેલાં રાજ્યના રાજકારણમાં મોટા ફેરફારો જોવા મળ્યા છે. ચૂંટણી પંચના વચગાળાના આદેશ બાદ, મૂળ નામ અને પરંપરાગત 'ઘાસના ફૂલ'ના પ્રતીકથી અસ્થાયી રૂપે વંચિત થયેલી મમતા બેનર્જીની તૃણમૂલ કોંગ્રેસે ચૂંટણી જંગ માટે એક નવો લોગો અને નવું પ્રતીક જાહેર કર્યું છે.

મમતા બેનર્જી અને ઋતાબ્રત બેનર્જી વચ્ચે પાર્ટીના નામ અને પ્રતીકની માલિકી અંગે ચાલી રહેલા આંતરિક વિવાદને પગલે ચૂંટણી પંચે તૃણમૂલનું મૂળ નામ અને 'ઘાસના ફૂલ'નું પ્રતીક અસ્થાયી રૂપે સ્થિર (ફ્રીઝ) કરી દીધું હતું. આ પરિસ્થિતિને પહોંચી વળવા મમતા બેનર્જીની તૃણમૂલ કોંગ્રેસે કમિશનને 'મમતા' અને 'તૃણમૂલ' શબ્દો ધરાવતા ત્રણ નવા નામોના વિકલ્પો સુપરત કર્યા હતા.

ચૂંટણી પંચે પક્ષ માટે "મમતા ઓલ ઈન્ડિયા તૃણમૂલ કોંગ્રેસ" નામને મંજૂરી આપી છે. આ ઉપરાંત નવા પ્રતીક માટે સુઝાવવામાં આવેલા 'ફૂટબોલર' અને 'ક્રિકેટ બેટ'ના વિકલ્પોમાંથી કમિશને 'ફૂટબોલર' પ્રતીકની આબંટન કર્યું છે. ઉલ્લેખનીય છે કે ૨૦૨૧ની વિધાનસભા ચૂંટણી દરમિયાન મમતા બેનર્જી નંદીગ્રામમાં વ્હીલચેર પર બેસીને હાથમાં ફૂટબોલ પકડીને પ્રચાર કરતા જોવા મળ્યા હતા.

પાર્ટીના નવા લોગોમાં વાદળી પૃષ્ઠભૂમિ પર સફેદ અક્ષરોમાં નવું નામ લખાયેલું છે. જેમાં ફૂટબોલરનું પ્રતીક અને ભારતીય રાષ્ટ્રધ્વજના ત્રિરંગાની ઝલક પણ સામેલ કરવામાં આવી છે.

મમતા બેનર્જીએ તમામ પક્ષીય નેતાઓ અને કાર્યકરોને નવા લોગો અને 'ફૂટબોલર' પ્રતીક સાથે તાત્કાલિક મેદાનમાં ઉતરી જવા અને મતદારોમાં નવી ઓળખ સ્થાપિત કરવા આદેશ આપ્યો છે. નંદીગ્રામ અને રાજનગરમાં આગામી ૬ ઓક્ટોબરે પેટાચૂંટણીઓ યોજાવાની છે, ત્યારબાદ કોલકાતા મ્યુનિસિપલ કોર્પોરેશન સહિત અન્ય સ્થાનિક સ્વરાજ્યની સંસ્થાઓની ચૂંટણીઓ યોજાશે.