પટના: બિહારની નવી સમ્રાટ ચૌધરી સરકારના મંત્રીમંડળમાં એક એવા નામની ચર્ચા આખા રાજ્યમાં થઈ રહી છે, જેમની સફળતા કોઈ ફિલ્મી વાર્તાથી ઓછી નથી. જહાનાબાદના એક સાધારણ ખેડૂત પરિવારના દીકરા ડૉ. પ્રમોદ કુમાર ચંદ્રવંશીએ સાબિત કરી દીધું છે કે જો મનમાં અતૂટ શ્રદ્ધા અને મહેનત કરવાની તૈયારી હોય તો ગમે તેવો અભાવ પણ સફળતાનો રસ્તો રોકી શકતો નથી. આજે મંત્રી પદની શપથ લેનાર પ્રમોદભાઈએ એક સમયે પોતાનો અભ્યાસ પૂર્ણ કરવા માટે પટનાની સડકો પર સાયકલ ચલાવીને છાપાં વહેંચ્યા હતા અને ઘરે-ઘરે જઈને સરસવનું તેલ પણ વેચ્યું હતું.
ડૉ. પ્રમોદ ચંદ્રવંશીનો જન્મ એક અત્યંત સામાન્ય પરિવારમાં થયો હતો, જ્યાં ઉચ્ચ શિક્ષણ મેળવવું એ એક મોટું સપનું હતું. તેમના પિતા અયોધ્યા પ્રસાદ ખેતીકામ કરીને માંડ ઘર ચલાવતા હતા. પટનામાં રહીને અભ્યાસ દરમિયાન ખર્ચ કાઢવા માટે તેમણે અનેક નાના-મોટા કામો કર્યા. સવારે વહેલા ઉઠીને અખબાર વહેંચવા જવું અને ત્યારબાદ તેલ વેચવાના વ્યવસાયમાંથી મળેલી પાઈ-પાઈ જોડીને તેમણે પોતાની ડિગ્રી મેળવી હતી. આજે પણ તેમનો તેલનો વ્યવસાય ચાલુ છે, જે હવે તેમના કર્મચારીઓ સંભાળે છે.
નવાઈની વાત એ છે કે, આજે મંત્રી હોવા છતાં તેમનું જમીન સાથેનું જોડાણ અતૂટ છે. ગામના લોકો જણાવે છે કે માત્ર બે વર્ષ પહેલા સુધી તેમનું પૈતૃક ઘર એક કાચી ઝૂંપડી જેવું હતું. બાદમાં ભાઈઓના સહયોગથી ત્યાં એક નાનું પાકું મકાન બનાવવામાં આવ્યું છે. તેમના ભાઈ પટનાની એક ગેસ એજન્સીમાં સામાન્ય પગાર પર નોકરી કરે છે, જે આ પરિવારની પ્રામાણિકતા અને સાદગીનો પુરાવો આપે છે.
પોતાની રાજકીય સફર અખિલ ભારતીય વિદ્યાર્થી પરિષદ (ABVP) થી શરૂ કરનાર ડૉ. ચંદ્રવંશી અગાઉ પણ નીતીશ સરકારમાં મંત્રી રહી ચૂક્યા છે. દાયકાઓના સંઘર્ષ અને ત્યાગ બાદ મળેલી આ સફળતા માત્ર તેમની વ્યક્તિગત જીત નથી, પરંતુ તે દરેક યુવાન માટે આશાનું કિરણ છે જે અભાવમાં રહીને મોટા સપના જોવાની હિંમત રાખે છે. આજે જ્યારે તેઓ નવી જવાબદારી સંભાળી રહ્યા છે, ત્યારે આખો જિલ્લો તેમની જીવંતતા પર ગૌરવ અનુભવી રહ્યો છે.