નવી દિલ્હી:એસઆઈઆર (SIR) વિરુદ્ધ કોંગ્રેસની આગેવાની હેઠળ વિપક્ષી દળો દ્વારા રામલીલા મેદાન ખાતે મુખ્ય કાર્યકારી અધિકારી જ્ઞાનેશ કુમારના રાજીનામાની માંગ સાથે વિશાળ વિરોધ પ્રદર્શન યોજાઈ રહ્યું છે. રામલીલા મેદાનની ક્ષમતા ૫૦,૦૦૦ ની હોવા છતાં કોંગ્રેસે રેલીમાં ૧૦ લાખ લોકો એકઠા થવાનો દાવો કર્યો છે. આ દરમિયાન કેન્દ્રીય મંત્રી જેપી નડ્ડાએ આકરા પ્રહારો કરતા જણાવ્યું છે કે આ રેલી શીખ ભાઈઓના ઘા પર મીઠું ચોંટવા અને ચૂંટાયેલી સરકારને અસ્થિર કરવાના હેતુથી યોજવામાં આવી છે, જે કોંગ્રેસની શબપેટીમાં અંતિમ ખીલો સાબિત થશે.

ભાજપે સોશિયલ મીડિયા પ્લેટફોર્મ એક્સ (X) પર વિપક્ષી મેગા રેલી અંગે એક વિવાદિત પોસ્ટર જાહેર કરીને તેને "ગુંડાઓનો મેળો" ગણાવ્યો હતો અને આરોપ લગાવ્યો હતો કે રાષ્ટ્રવિરોધી શક્તિઓના ઈશારે દેશમાં અરાજકતા ફેલાવવાનો પ્રયાસ થઈ રહ્યો છે. આ તરફ ભાજપ નેતા હરદીપ સિંહ પુરીના નેતૃત્વમાં ભાજપે પણ ૧૯૮૪ના શીખ વિરોધી રમખાણોના વિરોધમાં હરિ નગરથી કૂચ શરૂ કરી છે. કનોટ પ્લેસથી મિંતો રોડ થઈને નીકળેલી કોંગ્રેસની કૂચ દરમિયાન મિંતો રોડ પર લગાવેલા ભાજપના વિરોધ પોસ્ટરો ફાડી નંખાયા હોવાના આરોપો પણ સામે આવ્યા છે.

રામલીલા મેદાન અને આસપાસના વિસ્તારોમાં સુરક્ષા વ્યવસ્થા અત્યંત સઘન બનાવી દેવામાં આવી છે. સમગ્ર આયોજન સ્થળને ૧૪ ઝોનમાં વહેંચવામાં આવ્યું છે, જેનું નિરીક્ષણ એસીપી (ACP) અને એડીસીપી (ADCP) સ્તરના ઉચ્ચ અધિકારીઓ કરી રહ્યા છે. સુરક્ષા માટે આશરે ૧૦,૦૦૦ પોલીસ કર્મચારીઓ તૈનાત કરાયા છે અને સમગ્ર વિસ્તાર પર નજર રાખવા માટે ડ્રોન તેમજ ૨૫૦ થી વધુ સીસીટીવી કેમેરા સક્રિય કરવામાં આવ્યા છે.

રાજધાની દિલ્હીમાં એક તરફ વિપક્ષનું શક્તિ પ્રદર્શન અને બીજી તરફ ભાજપનો વિરોધ કૂચને પગલે રાજકીય માહોલમાં ભારે ગરમાવો આવી ગયો છે. સ્થાનિક પોલીસ અને પ્રશાસન દ્વારા પરિસ્થિતિ સંપૂર્ણપણે નિયંત્રણ હેઠળ રહે તે માટે તમામ સુરક્ષાત્મક તકેદારીઓ રાખવામાં આવી રહી છે, જ્યારે બંને પક્ષો વચ્ચેની નિવેદનબાજી આગામી દિવસોમાં વધુ આક્રમક બનવાની પૂરેપૂરી સંભાવના છે.