દતિયા : મધ્યપ્રદેશના રાજકારણમાં ભારે ગરમાવો જગાવતી દતિયા વિધાનસભા પેટાચૂંટણીમાં આખરે ભાજપ હાઈકમાન્ડ ડેમેજ કંટ્રોલ કરવામાં સફળ રહ્યું છે. પૂર્વ ગૃહમંત્રી નરોત્તમ મિશ્રાને ટિકિટ ન મળતા તેમના સમર્થકોમાં ફેલાયેલો રોષ અને ત્યારબાદ થયેલા હિંસક વિરોધ પ્રદર્શન પછી, આખરે મિશ્રાએ પોતે જ પાર્ટીના નેતૃત્વ સાથે બેઠક કરી મામલો થાળે પાડ્યો છે. મુખ્યમંત્રી મોહન યાદવના નિવાસસ્થાને મળેલી આ ગુપ્ત બેઠક બાદ નરોત્તમ મિશ્રાએ નરમ વલણ અપનાવતા પક્ષના ઉમેદવાર આશુતોષ તિવારીને સમર્થન આપવાના સંકેત આપ્યા છે.

સમર્થકોનો રોષ અને હિંસક વિરોધ

ભાજપે જ્યારે દતિયા બેઠક પરથી નરોત્તમ મિશ્રાને બદલે આશુતોષ તિવારીને ટિકિટ જાહેર કરી, ત્યારે મિશ્રાના સમર્થકો ઉગ્ર બની ગયા હતા. પરિસ્થિતિ એટલી વણસી હતી કે સમર્થકોએ રાષ્ટ્રીય ધોરીમાર્ગ-44 પર 12 કલાક સુધી ચક્કાજામ કર્યો હતો અને પોલીસ પર પથ્થરમારો પણ કર્યો હતો, જેમાં પોલીસ અધિક્ષક સહિતના અધિકારીઓ ઈજાગ્રસ્ત થયા હતા. આ ઘટના બાદ સ્થાનિક પક્ષના હોદ્દેદારોએ રાજીનામાં આપીને ભાજપ માટે મુશ્કેલી ઊભી કરી હતી.

શું બોલ્યા નરોત્તમ મિશ્રા?

મુખ્યમંત્રી મોહન યાદવ, પ્રદેશ પ્રમુખ હેમંત ખંડેલવાલ અને સંગઠન મહામંત્રી અજય જામવાલ સાથેની બેઠક બાદ નરોત્તમ મિશ્રાએ મીડિયા સાથે વાત કરતા જણાવ્યું કે, "પાર્ટીએ મને ઘણું આપ્યું છે, મને ટિકિટ ન મળવાની કોઈ ફરિયાદ કે નારાજગી નથી. જે થશે તે શ્રેષ્ઠ માટે થશે." તેમણે પાર્ટી બદલવાની તમામ અફવાઓને સદંતર ફગાવી દીધી છે અને સ્પષ્ટતા કરી છે કે તેઓ આગામી સમયમાં પક્ષના ઉમેદવાર આશુતોષ તિવારીના નામાંકનમાં હાજરી આપશે અને જરૂર પડશે તો પ્રચાર પણ કરશે.

દતિયા બેઠક પર પેટાચૂંટણી કેમ?

દતિયા વિધાનસભા બેઠક પર પેટાચૂંટણીનું મુખ્ય કારણ કોંગ્રેસના નેતા રાજેન્દ્ર ભારતીનું ગેરલાયક ઠરવું છે. છેલ્લી ચૂંટણીમાં નરોત્તમ મિશ્રાને હરાવનાર રાજેન્દ્ર ભારતીને છેતરપિંડીના એક કેસમાં દિલ્હીની કોર્ટે ત્રણ વર્ષની જેલની સજા ફટકારતા તેમનું ધારાસભ્ય પદ રદ થયું હતું. હવે આ બેઠક પર 30 જુલાઈના રોજ મતદાન થશે અને 3 ઓગસ્ટે પરિણામો જાહેર થશે.

પક્ષની સ્થિતિ અને પડકારો

ભલે નરોત્તમ મિશ્રાએ શાંતિની અપીલ કરી હોય, પરંતુ ગ્રાઉન્ડ લેવલ પર સમર્થકોને મનાવવા એ એક મોટો પડકાર છે. મિશ્રાએ સ્પષ્ટ કર્યું છે કે બધા કાર્યકરો પાર્ટી પરિવારના સભ્ય છે અને તેમના મનભેદ વાતચીત દ્વારા દૂર કરવામાં આવશે. ભાજપના આ 'ડેમેજ કંટ્રોલ' મિશન બાદ હવે જોવાનું એ રહેશે કે શું દતિયામાં મિશ્રાનું સમર્થન પાર્ટીને વિજય અપાવવામાં મદદરૂપ થશે કે નહીં.