નવી દિલ્હી : મુખ્ય ચૂંટણી કમિશનર જ્ઞાનેશ કુમાર સામે કોંગ્રેસ દ્વારા યોજાયેલી નકલી મહાભિયોગ કાર્યવાહી સામે ભારતીય જનતા પાર્ટીએ આક્રમક વલણ અપનાવ્યું છે. ભાજપના રાષ્ટ્રીય પ્રવક્તા અને સાંસદ સંબિત પાત્રાએ પત્રકાર પરિષદને સંબોધતા વિરોધ પક્ષના નેતા રાહુલ ગાંધી પર આકરા પ્રહારો કર્યા હતા. તેમણે કટાક્ષ કરતા જણાવ્યું હતું કે વારંવાર ચૂંટણીમાં હારતા કોંગ્રેસીઓએ રાહુલ ગાંધી માટે એક નકલી સંસદ બનાવીને તેમને નકલી વડાપ્રધાન બનાવી દેવા જોઈએ. વિપક્ષી નેતાઓ સ્પેશિયલ ઇન્ટેન્સિવ રિવિઝન (SIR) સંબંધિત અખબારી અહેવાલોનો આધાર બનાવીને શાસક પક્ષને ફાયદો પહોંચાડવાનો નકલી આરોપ લગાવી આંદોલનો દ્વારા લોકતાંત્રિક સરકારને અસ્થિર કરવાનો નિષ્ફળ પ્રયાસ કરી રહ્યા છે.
પાત્રાએ ચોંકાવનારો આરોપ લગાવતા કહ્યું કે વિપક્ષનું આ આંદોલન વિદ્યાર્થીઓના ભવિષ્ય માટે નહીં પરંતુ ભારતમાં બાંગ્લાદેશ કે નેપાળ જેવી હિંસક સ્થિતિ સર્જીને ગેરકાયદેસર રીતે સત્તા કબજે કરવાનું કાવતરું છે. ડાબેરી વિદ્યાર્થી સંગઠન AISA ના નેતા નેહા બોરા અને કોંગ્રેસના શાસન પરિવર્તનના એજન્ડા પર પ્રશ્નો ઉઠાવતા તેમણે ઉમેર્યું કે ભારત કોઈ 'બનાના રિપબ્લિક' નથી જ્યાં સેના કે પોલીસ સરકાર સામે બળવો કરી દે. સર્જિકલ સ્ટ્રાઇક અને સુરક્ષાદળો પર સવાલ ઉઠાવતા વિપક્ષી નેતાઓને ચેતવણી આપતા તેમણે સ્પષ્ટ કર્યું કે ભારત માત્ર જંતર-મંતરની બે કિલોમીટરની ત્રિજ્યામાં સીમિત નથી પરંતુ વિશાળ દેશ છે, જ્યાં જંતર-મંતરથી શરૂ થયેલું આ આંદોલન ત્યાં જ દબાઈ જશે.
કોંગ્રેસે મોક સંસદમાં વર્તમાન NDA સરકારને ગેરકાયદેસર ગણાવીને 'જાહેર મહાભિયોગ'નું નાટક રચી જનતાને ગેરમાર્ગે દોરવાનો પ્રયાસ કર્યો હોવાનો ભાજપે સખત વિરોધ કર્યો છે. ચૂંટણી પંચની નિષ્પક્ષતા પર સવાલો ઉઠાવીને સંસ્થાની છબી ખરડવાના વિપક્ષના આ પગલાને શાસક પક્ષે સત્તા મેળવવાની ભયાનક અધીરાઈ ગણાવી છે. આખી કવાયત માત્ર જનતાનું ધ્યાન ભટકાવવા અને જનાદેશનો અનાદર કરવા માટે કરવામાં આવી હોવાનો દાવો ભાજપ દ્વારા કરવામાં આવ્યો છે.
મુખ્ય ચૂંટણી કમિશનર સામે વિપક્ષ દ્વારા કરવામાં આવેલા આક્ષેપો અને મોક મહાભિયોગ બાદ દેશના રાજકારણમાં ભારે ગરમાવો આવી ગયો છે. ચૂંટણી પંચે તમામ આરોપોને પાયાવિહોણા ગણાવ્યા છે અને SIR પ્રક્રિયા સંપૂર્ણપણે કાયદાકીય મર્યાદામાં રહીને થઈ રહી હોવાની સ્પષ્ટતા કરી છે. બીજી તરફ, ભાજપ આ મુદ્દાને ગૃહમાં અને જનતાની અદાલતમાં લઈ જઈ કોંગ્રેસની દેશવિરોધી માનસિકતા ખુલ્લી પાડવાની તૈયારી કરી રહ્યું છે. સંસદના આગામી સત્રમાં આ નકલી સંસદ અને બંધારણીય સંસ્થાઓના અપમાન મુદ્દે બંને પક્ષો વચ્ચે ભારે હંગામો થવાના અંધાણ વર્તાઈ રહ્યા છે.