ગાઝા,  એક તરફ અમેરિકી રાષ્ટ્રપતિ ડોનાલ્ડ ટ્રમ્પના નેતૃત્વ હેઠળનું 'બોર્ડ ઓફ પીસ' ગાઝામાં કાયમી શાંતિ સ્થાપવા માટે એડીચોટીનું જોર લગાવી રહ્યું છે, ત્યારે બીજી તરફ ઇઝરાયેલી એર સ્ટ્રાઇકે ફરી એકવાર આશાના કિરણો પર પાણી ફેરવી દીધું છે. હમાસના વરિષ્ઠ અધિકારી બાસિમ નઈમે પુષ્ટિ કરી છે કે, હમાસના મુખ્ય વાટાઘાટકાર ખલીલ અલ-હૈયાના પુત્ર અઝ્ઝામ અલ-હૈયાનું ઇઝરાયેલી હુમલામાં મોત નીપજ્યું છે. બુધવારે રાત્રે થયેલા આ હુમલામાં ગંભીર રીતે ઘાયલ થયા બાદ અઝ્ઝામનું ગુરુવારે મોત થયું હતું.
ખલીલ અલ-હૈયાએ અત્યાર સુધીમાં ૪ પુત્રો ગુમાવ્યા
ખલીલ અલ-હૈયા હમાસના એવા નેતા છે જેમના પર અત્યાર સુધી અનેકવાર જીવલેણ હુમલા થયા છે અને તેઓ ચમત્કારિક રીતે બચી ગયા છે. જોકે, આ સંઘર્ષમાં તેમણે અત્યાર સુધીમાં કુલ ચાર પુત્રોને ગુમાવ્યા છે. ૨૦૦૮ અને ૨૦૧૪ના ગાઝા હુમલામાં બે પુત્રો અને ગયા વર્ષે દોહામાં થયેલા હુમલામાં ત્રીજા પુત્રના મોત બાદ હવે ચોથા પુત્રના અવસાનથી હમાસ છાવણીમાં ભારે રોષ જોવા મળી રહ્યો છે. હૈયાએ આરોપ લગાવ્યો છે કે ઇઝરાયેલ જાણી જોઈને મધ્યસ્થીઓના પ્રયત્નોને નિષ્ફળ બનાવવા અને ટ્રમ્પના ગાઝા પ્લાનને પાટા પરથી ઉતારવા આવા હુમલા કરી રહ્યું છે.
ટ્રમ્પના 'ગાઝા પ્લાન' પર સંકટના વાદળો
આ હુમલો એવા સમયે થયો છે જ્યારે હમાસ અને અન્ય પેલેસ્ટિનિયન જૂથોના નેતાઓ કાઈરોમાં પ્રાદેશિક મધ્યસ્થીઓ અને ટ્રમ્પના ખાસ દૂત નિકોલે મ્લાદેનોવ સાથે વાતચીત કરી રહ્યા છે. ઓક્ટોબરમાં થયેલા કરાર મુજબ, ઇઝરાયેલની સેનાએ ગાઝામાંથી ખસી જવાનું છે અને હમાસે હથિયારો નીચે મૂકવાના છે. પરંતુ હમાસનું નિઃશસ્ત્રીકરણ એ અત્યારે સૌથી મોટો વિવાદનો વિષય બન્યો છે. હમાસે સ્પષ્ટ કર્યું છે કે જ્યાં સુધી ઇઝરાયેલ પ્રથમ તબક્કાની શરતો અને હુમલાઓ સંપૂર્ણપણે બંધ નહીં કરે, ત્યાં સુધી તેઓ બીજા તબક્કાની ચર્ચામાં જોડાશે નહીં.
હિંસાનું ચક્ર અટકવાનું નામ નથી લેતું
કરાર અમલમાં આવ્યા હોવા છતાં સ્થાનિક તબીબોના જણાવ્યા મુજબ અત્યાર સુધીમાં ૮૩૦ પેલેસ્ટિનિયનોના મોત થયા છે, જ્યારે ઇઝરાયેલનો દાવો છે કે આ સમયગાળા દરમિયાન ચાર સૈનિકો પણ માર્યા ગયા છે. ઇઝરાયેલી સેનાએ આ હુમલા અંગે હજુ સુધી કોઈ સત્તાવાર નિવેદન આપ્યું નથી, પરંતુ તેઓ તેને આતંકવાદી પ્રવૃત્તિઓ રોકવા માટેની કાર્યવાહી ગણાવી રહ્યા છે. આ તાજા હિંસાકાંડથી કાઈરોમાં ચાલી રહેલી શાંતિ મંત્રણાઓ અનિશ્ચિતતાના ગર્તામાં ધકેલાઈ ગઈ છે.