કોલકાતા, તા.૦૭: પશ્ચિમ બંગાળમાં ચૂંટણી પછીની હિંસા અટકવાનું નામ નથી લઈ રહી. ભાજપ નેતા શુભેન્દુ અધિકારીના અંગત મદદનીશ ચંદ્રનાથ રથની ગોળી મારીને હત્યા કરાયાના ગણતરીના કલાકોમાં જ, ઉત્તર ૨૪ પરગણા જિલ્લાના પાનીહાટીમાં ભાજપના કાર્યકરો પર જીવલેણ બોમ્બ હુમલો કરવામાં આવ્યો છે. આ હુમલામાં ભાજપના પાંચ સમર્થકો ગંભીર રીતે ઘાયલ થયા હોવાના અહેવાલ છે, જેમને તાત્કાલિક કોલકાતાની આર.જી. કર મેડિકલ કોલેજ અને હોસ્પિટલમાં ખસેડવામાં આવ્યા છે.
ઘટનાની વિગતો મુજબ, પાનીહાટીના વોર્ડ નંબર ૨ માં દત્તા રોડ પર ભાજપના કાર્યકરો સ્થાનિક રહીશો સાથે વાતચીત કરી રહ્યા હતા, ત્યારે અચાનક મોટરસાયકલ પર આવેલા અજાણ્યા હુમલાખોરોએ અંધાધૂંધ ક્રૂડ બોમ્બ ફેંક્યા હતા. આ ધડાકાઓને કારણે સમગ્ર વિસ્તારમાં અફરાતફરી મચી ગઈ હતી. ભાજપનો આરોપ છે કે આ હુમલો સત્તાધારી તૃણમૂલ કોંગ્રેસના ગુંડાઓ દ્વારા કરવામાં આવ્યો છે, જોકે TMC એ આ આરોપોને સદંતર નકારી કાઢ્યા છે.
સંવેદનશીલ વિસ્તારમાં હુમલો: પોલીસ છાવણીમાં ફેરવાયું પાનીહાટી
ચોંકાવનારી વાત એ છે કે આ બોમ્બ બ્લાસ્ટ જે વિસ્તારમાં થયો છે, તે આર.જી. કર હોસ્પિટલની બળાત્કાર પીડિતાના માતા અને ભાજપના નવનિયુક્ત ધારાસભ્ય રત્ના દેવનાથના નિવાસસ્થાનની એકદમ નજીક છે. આ હુમલા બાદ વિસ્તારમાં ભારે તંગદિલી વ્યાપી ગઈ છે અને સુરક્ષાના ભાગરૂપે ચુસ્ત પોલીસ બંદોબસ્ત ગોઠવી દેવામાં આવ્યો છે.
સીસીટીવી ફૂટેજ અને દરોડાની કાર્યવાહી
કોલકાતા પોલીસના ઉચ્ચ અધિકારીએ જણાવ્યું હતું કે, "અમે આ મામલે તપાસ શરૂ કરી દીધી છે. હુમલાખોરોને ઓળખવા માટે આસપાસના સીસીટીવી ફૂટેજ ખંગાળવામાં આવી રહ્યા છે અને દોષિતોને પકડવા માટે અલગ-અલગ સ્થળોએ દરોડા પાડવામાં આવી રહ્યા છે." પોલીસે લોકોને અફવાઓ પર ધ્યાન ન આપવા અને શાંતિ જાળવી રાખવા અપીલ કરી છે. બંગાળમાં એક પછી એક બની રહેલી હિંસાની ઘટનાઓએ કાયદો અને વ્યવસ્થાની સ્થિતિ પર ગંભીર સવાલો ઉભા કર્યા છે.