​વિયેતનામ: વિયેતનામમાં ફુ કુઓક ટાપુ પાસે તાજેતરમાં સર્જાયેલી ભયાનક હોડી દુર્ઘટનામાં ૧૫ ભારતીય પ્રવાસીઓના કરુણ મોત નીપજ્યા છે. આ હૃદયદ્રાવક ઘટના બાદ, હવે તમામ મૃતકોના પાર્થિવ દેહને હો ચી મિન્હ સિટી પહોંચાડવામાં આવ્યા છે, જ્યાંથી તેમને ટૂંક સમયમાં ભારત લાવવાની પ્રક્રિયા હાથ ધરવામાં આવી છે. ભારતીય દૂતાવાસ અને સ્થાનિક વહીવટીતંત્ર મૃતદેહોને ઝડપથી તેમના સ્વજનો સુધી પહોંચાડવા માટે યુદ્ધના ધોરણે કામ કરી રહ્યા છે.

​સમયસર સારવાર મળી હોત તો અનેક જીવ બચી શક્યા હોત: survivors

આ અકસ્માતમાંથી જીવતા બચી ગયેલા પ્રવાસીઓએ દુર્ઘટના સ્થળ પરની તબીબી વ્યવસ્થાઓ સામે ગંભીર સવાલો ઉઠાવ્યા છે. બચી ગયેલા પ્રવાસીઓના જણાવ્યા અનુસાર, જ્યારે હોડી પલટી ગઈ અને લોકોને પાણીમાંથી બહાર કાઢવામાં આવ્યા, ત્યારે ત્યાં કોઈ તાલીમબદ્ધ ડોક્ટર કે ઇમરજન્સી મેડિકલ ટીમ હાજર નહોતી. પીડિતોએ જાતે જ એકબીજાને CPR (કાર્ડિયોપલ્મોનરી રિસસિટેશન) આપીને જીવ બચાવવાનો નિષ્ફળ પ્રયાસ કર્યો હતો. એક પ્રવાસીએ આક્રોશ વ્યક્ત કરતા જણાવ્યું હતું કે, "જો ત્યાં પ્રાથમિક તબીબી સુવિધાઓ અને ઓક્સિજન જેવી જીવનરક્ષક વસ્તુઓ ઉપલબ્ધ હોત, તો અમે ઓછામાં ઓછા ૫ થી ૬ વધુ જીવ બચાવી શક્યા હોત. તબીબી સહાયના અભાવે લોકો અમારી નજર સામે જ દમ તોડી રહ્યા હતા."

​શું બની હતી ઘટના?

આ દુર્ઘટના ત્યારે ઘટી જ્યારે ૩૨ ભારતીય પ્રવાસીઓ અને ૪ ક્રૂ મેમ્બર્સ સહિત કુલ ૩૬ લોકોથી ભરેલી સ્પીડબોટ હોન મે રુત ટાપુથી અન થોઈ પોર્ટ પરત ફરી રહી હતી. અચાનક આવેલા તોફાન અને દરિયાના જોરદાર મોજાંઓને કારણે કિનારાથી માત્ર ૪૦૦ મીટર દૂર હોડી પલટી ગઈ હતી. આ અકસ્માતમાં ૧૫ પ્રવાસીઓનાં મોત થયા હતા, જ્યારે ૨૧ લોકોને રેસ્ક્યુ કરવામાં સફળતા મળી હતી. મૃતકોમાં ૧૦ લોકો તમિલનાડુના, ૩ આંધ્રપ્રદેશના અને ૨ કેરળના હોવાનું સત્તાવાર રીતે જાહેર કરવામાં આવ્યું છે.

​તપાસ અને મદદ માટે તંત્ર એલર્ટ

વિયેતનામમાં ભારતીય દૂતાવાસે તાત્કાલિક અસરથી કંટ્રોલ રૂમ શરૂ કરીને મૃતકોના પરિવારોને માહિતી પહોંચાડી છે. દુર્ઘટનાની ગંભીરતાને જોતા વિયેતનામ સરકારે આ મામલે ઉચ્ચસ્તરીય તપાસના આદેશ આપ્યા છે અને હોડી સંચાલક સાથે જોડાયેલ એક વ્યક્તિની ધરપકડ પણ કરવામાં આવી છે. ૧૫ survivors ને હોસ્પિટલમાંથી ડિસ્ચાર્જ આપીને ભારત પરત લાવવામાં આવ્યા છે, જ્યારે અન્ય ઇજાગ્રસ્તોની સારવાર કરવામાં આવી રહી છે. ભારત સરકારના વિદેશ મંત્રાલય અને સંબંધિત રાજ્ય સરકારો પણ સતત સંપર્કમાં રહીને પીડિત પરિવારોને શક્ય તમામ મદદ કરી રહી છે.