​શિરડી:  મહારાષ્ટ્ર સરકારના મંત્રી અને ભારતીય જનતા પાર્ટીના ધારાસભ્ય નીતેશ રાણેએ બોલીવુડના સુપરસ્ટાર આમિર ખાનની ત્રીજી લગ્નને લઈને એક મોટો વિવાદ છેડ્યો છે. શિરડીમાં સાંઈબાબાના દર્શન માટે આવેલા મંત્રી નીતેશ રાણેએ પત્રકારો સાથેની વાતચીતમાં આમિર ખાન પર આકરા શબ્દોમાં પ્રહારો કર્યા હતા. તેમણે આમિર ખાનને 'લવ જેહાદ'ના બ્રાન્ડ એમ્બેસેડર તરીકે સંબોધતા રાજકીય અને સામાજિક વર્તુળોમાં ભારે ચર્ચા જાગી છે.

​આમિર ખાને તાજેતરમાં જ મુંબઈના બાંદ્રા સ્થિત તેમના નિવાસસ્થાને એક ખાનગી સમારોહમાં ગૌરી સ્પ્રેટ સાથે ત્રીજા લગ્ન કર્યા છે. આ લગ્ન બાદ હવે રાજકીય નિવેદનબાજી તેજ બની છે. મંત્રી નીતેશ રાણેએ આ અંગે પોતાની પ્રતિક્રિયા આપતા કહ્યું હતું કે, જ્યારે આવી સેલિબ્રિટીઝ તેમના અંગત જીવનમાં આ પ્રકારના નિર્ણયો લે છે, ત્યારે હિંદુ સમાજે આ વિષય પર ગંભીરતાથી વિચાર કરવાની જરૂર છે.

​નીતેશ રાણેએ વધુમાં ઉમેર્યું હતું કે, જે હિંદુ યુવાનો આવા કલાકારોને પોતાના આદર્શ માને છે અને તેમની ફિલ્મો જુએ છે, તેમણે હવે આ અંગે સ્પષ્ટપણે વિચારવું જોઈએ કે તેઓ કોને પ્રોત્સાહન આપી રહ્યા છે. તેમણે હિંદુ યુવાનોને અપીલ કરી હતી કે કોઈ પણ વ્યક્તિને સેલિબ્રિટી બનાવતા પહેલા કે તેમની ફિલ્મો જોતા પહેલા સમાજે તેના પરિણામો અને પ્રેરણા વિશે વિચારવું અત્યંત આવશ્યક છે.

​નોંધનીય છે કે આમિર ખાનના આ ત્રીજા લગ્ન છે. અગાઉ તેમણે વર્ષ 1986 થી 2002 સુધી રીના દત્તા સાથે અને ત્યારબાદ વર્ષ 2005 થી 2021 સુધી કિરણ રાવ સાથે લગ્નજીવન ગાળ્યું હતું. હવે ગૌરી સ્પ્રેટ સાથેના તેમના લગ્ન અંગે મંત્રી નીતેશ રાણેએ કરેલી આ ટિપ્પણીએ સોશિયલ મીડિયા અને રાજકીય મંચો પર ચર્ચાનો વિષય બનાવી દીધો છે. આ નિવેદન બાદ હવે અલગ-અલગ રાજકીય પક્ષો અને સંગઠનો તરફથી પણ મિશ્ર પ્રતિક્રિયાઓ સામે આવી રહી છે. મંત્રીના આ નિવેદન અંગે આમિર ખાન તરફથી હજુ સુધી કોઈ સત્તાવાર પ્રતિક્રિયા આપવામાં આવી નથી.