મુંબઈ : મુંબઈ અને પુણેના અતિ સંવેદનશીલ સ્થળો તથા મહાનગરોના મહત્વપૂર્ણ કાર્યાલયોને બોમ્બથી ઉડાવી દેવાની ચેતવણી આપતો ઇ-મેઇલ સામે આવતા ગુરુવારે સવારથી જ સુરક્ષા એજન્સીઓમાં ભારે ચિંતા અને દોડધામ મચી ગઈ હતી.

પ્રાપ્ત વિગતો અનુસાર, ખાલિસ્તાન નેશનલ આર્મી અને ખાલિસ્તાન નેશનલ પાર્ટી નામના સંગઠનના નામે મોકલાયેલા આ ધમકીભર્યા ઇ-મેઇલમાં મહાનાયક અમિતાભ બચ્ચનના 'જલસા' બંગલા, મુંબઈ એરપોર્ટ, પીએનબી બેંક અને બંને મહાનગરપાલિકાની ઓફિસોને નિશાન બનાવવાની ધમકી અપાઈ હતી.

ગુરુવારે સવારે આ ઇ-મેઇલ પ્રાપ્ત થતાં જ મુંબઈ પોલીસ, ક્રાઇમ બ્રાન્ચ અને બોમ્બ ડિટેક્શન એન્ડ ડિસ્પોઝલ સ્કવોડ (બીડીડીએસ) ની ટીમો ત્વરિત હરકતમાં આવી ગઈ હતી અને તમામ સંબંધિત સ્થળો પર પહોંચીને સઘન ચેકિંગ હાથ ધર્યું હતું.

તપાસ દરમિયાન સુરક્ષા એજન્સીઓ દ્વારા એરપોર્ટ, બેંક અને અમિતાભ બચ્ચનના નિવાસસ્થાન સહિતના તમામ સ્થળોની ઊંડાણપૂર્વક તપાસ કરવામાં આવી હતી, જ્યાંથી કોઈ પણ પ્રકારની શંકાસ્પદ કે વિસ્ફોટક વસ્તુ ન મળી આવતા તંત્રએ રાહતનો શ્વાસ લીધો હતો.

મુંબઈ ઉપરાંત પુણે પાલિકા મુખ્યાલયને પણ બપોરે આવા જ પ્રકારનો ધમકીભર્યો ઇ-મેઇલ મળતા સુરક્ષા વધારી દેવામાં આવી હતી, અને અગાઉ પણ આવા ફાજલ અને અફવારૂપી ઇ-મેઇલ મળ્યા હોવાનું અધિકારીઓએ સત્તાવાર રીતે સ્પષ્ટ કર્યું હતું.

સુરક્ષા એજન્સીઓ દ્વારા આ બનાવ અંગે સાયબર સેલની મદદથી ઇ-મેઇલ મોકલનાર અજાણ્યા શખ્સોની ઓળખ માટેની સઘન તપાસ શરૂ કરવામાં આવી છે જેથી આ પ્રકારની અફવાઓ ફેલાવનારાઓ સામે કાયદેસરની કડક કાર્યવાહી કરી શકાય.