મુંબઈ, તા.૧૨: દેશની આર્થિક રાજધાની મુંબઈના મેયર રીતુ તાવડેની સત્તાવાર ઓફિસને ગુરુવારે અજાણ્યા શખ્સ દ્વારા ઈમેલના માધ્યમથી બોમ્બથી ઉડાવી દેવાની ધમકી મળતા વહીવટી તંત્ર અને સુરક્ષા એજન્સીઓમાં ભારે દોડધામ મચી ગઈ છે.

પ્રાપ્ત વિગતો અનુસાર, આ ધમકીભર્યો ઈમેલ મળ્યાની જાણ થતા જ સ્થાનિક પોલીસ કાફલો અને બોમ્બ ડિટેક્શન એન્ડ ડિસ્પોઝલ સ્ક્વોડ (BDDS) ના જવાનો તાત્કાલિક અસરથી મેયરની ઓફિસ ખાતે પહોંચી ગયા હતા અને સમગ્ર પરિસરને કોર્ડન કરીને સઘન તપાસ હાથ ધરી હતી.

મુંબઈ પોલીસે આ ઘટનાની સત્તાવાર પુષ્ટિ કરતા જણાવ્યું હતું કે સુરક્ષા પ્રોટોકોલ મુજબ તમામ ખૂણેખૂણાની ઝીણવટભરી તપાસ કરવામાં આવી રહી છે, જોકે આ નવા ઈમેલમાં શું લખાણ હતું અને તે ક્યાંથી મોકલવામાં આવ્યો હતો તે અંગે સાયબર સેલ દ્વારા તપાસ ચાલી રહી છે.

ઉલ્લેખનીય છે કે આ કોઈ પ્રથમ ઘટના નથી, આ અગાઉ ગત ઓક્ટોબર મહિનામાં પણ મેયરની ઓફિસને આવી જ એક ધમકીભર્યો ઈમેલ મળ્યો હતો, જેમાં મુંબઈની એક શાળા પર ગ્રેનેડ હુમલો કરવાની અને મહાલક્ષ્મી રેસ કોર્સમાં બોમ્બ વિસ્ફોટ કરવાની ચેતવણી આપવામાં આવી હતી.

અગાઉની તે ઘટના સમયે પણ પોલીસ તંત્ર દ્વારા પ્રમાણભૂત કાર્યપદ્ધતિ (SOP) મુજબ તમામ ઉલ્લેખિત સ્થળો પર તપાસ કરવામાં આવી હતી, પરંતુ તે સમયે કોઈ શંકાસ્પદ વસ્તુ કે વિસ્ફોટક સામગ્રી મળી આવી ન હતી અને તે માત્ર અફવા સાબિત થઈ હતી.

હાલમાં સુરક્ષા એજન્સીઓ દ્વારા સમગ્ર મામલાને અત્યંત ગંભીરતાથી લઈને ઈમેલ મોકલનાર આરોપીનું પગેરું મેળવવા માટે ટેકનિકલ સર્વેલન્સની મદદ લેવામાં આવી રહી છે, જેથી આ પ્રકારની દહેશત ફેલાવનારા તત્વો સામે કડક કાયદેસરની કાર્યવાહી કરી શકાય.