મુંબઈ : વૈશ્વિક બજારમાં ચાલી રહેલી આર્થિક અનિશ્ચિતતાઓ વચ્ચે ભારતીય અર્થતંત્ર અને રૂપિયાની મજબૂતી માટે ખૂબ જ રાહત આપનારા સમાચાર સામે આવ્યા છે. ભારતીય રિઝર્વ બેંક (RBI) દ્વારા શુક્રવારે જાહેર કરવામાં આવેલા સત્તાવાર આંકડા અનુસાર, ૩ જુલાઈના રોજ પૂરા થયેલા સપ્તાહમાં ભારતનો વિદેશી હૂંડિયામણ ભંડાર (Forex Reserve) $૭.૨૬ બિલિયન (આશરે ૭૨૬ કરોડ ડોલર) ના તોતિંગ વધારા સાથે $૬૭૪.૧૯ બિલિયન પર પહોંચી ગયો છે. તાજેતરના મહિનાઓમાં દેશની સરકારી તિજોરીમાં નોંધાયેલો આ સૌથી મોટો સાપ્તાહિક વધારો છે, જે આર્થિક મોરચે ભારતની મજબૂત સ્થિતિ દર્શાવે છે.

સોનાની ચમક અને વિદેશી ચલણે વધાર્યું દેશનું ગૌરવ

આરબીઆઈના અહેવાલ મુજબ, આ ઐતિહાસિક ઉછાળા પાછળ વિદેશી ચલણ સંપત્તિ (FCA) અને સોનાના ભંડારમાં આવેલી મજબૂત તેજી મુખ્ય કારણ છે. ભારતના ફોરેક્સ રિઝર્વનો સૌથી મોટો હિસ્સો ગણાતી વિદેશી ચલણ સંપત્તિ $૪.૫૧ બિલિયન વધીને $૫૪૫.૫૮ બિલિયન થઈ ગઈ છે. આ સાથે જ ભારતીય સેન્ટ્રલ બેંકના સોનાના ભંડાર (Gold Reserve) માં પણ જોરદાર સોનું ઉમેરાયું છે, જે $૨.૬૭ બિલિયનના ઉછાળા સાથે $૧૦૫.૨૧ બિલિયનના સ્તરે પહોંચી ગયું છે, જે એકંદર અનામત સ્થિતિને બહુ મોટો ટેકો પૂરો પાડે છે.

આંતરરાષ્ટ્રીય ફંડમાં પણ ભારતમાં સુધારો

રિપોર્ટિંગ સપ્તાહ દરમિયાન દેશના ફોરેક્સ રિઝર્વના તમામ મુખ્ય ઘટકોમાં ગ્રીન સિગ્નલ જોવા મળ્યું છે. આ સમયગાળામાં ઇન્ટરનેશનલ મોનેટરી ફંડ (IMF) પાસે રહેલા સ્પેશિયલ ડ્રોઇંગ રાઇટ્સ (SDRs) ૬૫ મિલિયન ડોલર વધીને ૧૮.૬૨ બિલિયન ડોલર થયા છે. આ ઉપરાંત આંતરરાષ્ટ્રીય નાણાકીય ભંડોળ (IMF) સાથે ભારતની પોતાની અનામત સ્થિતિ પણ ૧૫ મિલિયન ડોલરના સુધારા સાથે $૪.૭૯ બિલિયન થઈ ગઈ છે.

આંચકાઓ સામે ઢાલ બનશે આ રિઝર્વ

જો કે, માર્ચ ૨૦૨૬ ના અંતની સરખામણીએ કુલ અનામતમાં હજુ પણ $૧૬.૯૨ બિલિયનનો ઘટાડો જોવા મળી રહ્યો છે, પરંતુ વર્ષ-દર-વર્ષના ધોરણે સોનાના ભંડારમાં ૨૦.૩૬ બિલિયન ડોલરનો મોટો વધારો થયો છે. આ દર્શાવે છે કે વૈશ્વિક મંદી કે અનિશ્ચિતતા વચ્ચે આરબીઆઈ પોતાના ગોલ્ડ પોર્ટફોલિયોને સતત મજબૂત કરી રહી છે. ભારતમાં વિદેશી હૂંડિયામણનો આ વિશાળ ભંડાર આંતરરાષ્ટ્રીય આંચકાઓ સામે એક મજબૂત ઢાલ (બફર) તરીકે કામ કરે છે, જે જરૂરિયાતના સમયે શેરબજાર અને રૂપિયાના મૂલ્યને તૂટતા બચાવે છે અને ચૂકવણીની ક્ષમતામાં દુનિયાનો વિશ્વાસ વધારે છે.