ઉરી : ભારતીય સેનાના સૂત્રોના જણાવ્યા અનુસાર, શનિવાર અને રવિવારની મધ્યરાત્રિએ ઉરી સેક્ટરમાં હથલંગા-નામ્બલા એક્સિસ નજીક કેટલીક શંકાસ્પદ હિલચાલ જોવા મળી હતી. ચિનાર કોર્પ્સના સતર્ક જવાનોએ તરત જ આ વિસ્તારને ઘેરી લીધો હતો. આ કાર્યવાહી કોઈ સામાન્ય પેટ્રોલિંગ નહોતી, પરંતુ ચોક્કસ ગુપ્ત માહિતી  ના આધારે ગોઠવવામાં આવેલું જાળ હતું. સેનાએ ઘેરાબંધી મજબૂત કરી અને ભાગવાનો પ્રયાસ કરી રહેલા ત્રણ વ્યક્તિઓને જીવતા પકડી પાડ્યા છે.

પ્રાથમિક તપાસમાં બહાર આવ્યું છે કે પકડાયેલા ત્રણેય વ્યક્તિઓ સોપોર વિસ્તારના રહેવાસી હોઈ શકે છે અને તેઓ સીમા પાર  જવાના અથવા ત્યાંથી સૂચનાઓ મેળવવાના ફિરાકમાં હતા. પકડાયેલા શંકાસ્પદોમાં એક વ્યક્તિ ભૂતપૂર્વ ટેરિટોરિયલ આર્મીનો જવાન હોવાનું પણ ચર્ચાઈ રહ્યું છે, જે આ મામલાને વધુ ગંભીર બનાવે છે. સેના અને પોલીસ અત્યારે તેમની ઊંડી પૂછપરછ કરી રહી છે જેથી સરહદ પારના હેન્ડલર્સ સાથેના તેમના સંપર્કોની વિગતો મેળવી શકાય.

હાલમાં સમગ્ર ઉરી સેક્ટરમાં સેના દ્વારા સઘન સર્ચ ઓપરેશન ચલાવવામાં આવી રહ્યું છે. લાઈન ઓફ કંટ્રોલ પર સુરક્ષા વ્યવસ્થા લોખંડી બનાવી દેવામાં આવી છે અને ડ્રોન દ્વારા પણ દેખરેખ રાખવામાં આવી રહી છે. સેનાએ સ્પષ્ટ કર્યું છે કે કોઈપણ પ્રકારની દેશવિરોધી ગતિવિધિ કે ઘૂસણખોરીના પ્રયાસને સાંખી લેવામાં આવશે નહીં. આ સફળતાથી સીમા પાર બેઠેલા આતંકી આકાઓના મનસૂબાઓ પર ફરી એકવાર પાણી ફરી વળ્યું છે.