વોશિંગ્ટન; અમેરિકન રાષ્ટ્રપતિ ડોનાલ્ડ ટ્રમ્પે તેમના સત્તાવાર સોશિયલ મીડિયા પ્લેટફોર્મ ટ્રુથ સોશિયલ પર એક મોટી જાહેરાત કરતા જણાવ્યું છે કે તેઓએ ઈરાન પર થનારો લશ્કરી હુમલો હાલ પૂરતો અટકાવી દીધો છે. 

આંતરરાષ્ટ્રીય સમાચાર માધ્યમો અને ડિજિટલ પ્લેટફોર્મ એક્સ પર મિડલ ઈસ્ટ સ્પેક્ટેટર દ્વારા પણ આ સમાચારની પુષ્ટિ કરવામાં આવી છે. 

આ નિર્ણય કતારના અમીર શેખ તમીમ બિન હમાદ અલ થાની, સાઉદી અરેબિયાના ક્રાઉન પ્રિન્સ મોહમ્મદ બિન સલમાન અને સંયુક્ત આરબ અમીરાતના રાષ્ટ્રપતિ મોહમ્મદ બિન ઝાયેદ અલ નાહયાનની વિશેષ વિનંતી બાદ લેવામાં આવ્યો છે.

આ નેતાઓએ અમેરિકાને જાણ કરી હતી કે ઈરાન સાથે હાલમાં ખૂબ જ ગંભીર અને સકારાત્મક વાટાઘાટો ચાલી રહી છે, જેના પરિણામે એક ઐતિહાસિક કરાર થઈ શકે છે. આ કરાર મુજબ ઈરાન કોઈપણ સંજોગોમાં પરમાણુ હથિયારો બનાવી શકશે નહીં. 

આ મધ્યસ્થી અને મિત્ર દેશોના નેતાઓ પ્રત્યેના આદરને કારણે રાષ્ટ્રપતિ ટ્રમ્પે અમેરિકન યુદ્ધ સચિવ પીટ હેગસેથ અને જોઈન્ટ ચીફ ઓફ સ્ટાફના ચેરમેન જનરલ ડેનિયલ કેનને આવતીકાલનો નિર્ધારિત હુમલો ન કરવા કડક આદેશ આપ્યો છે.

જોકે, અમેરિકન લશ્કરને સ્પષ્ટ ચેતવણી સાથે સાબદું રહેવા પણ જણાવાયું છે. જો ઈરાન સાથે યોગ્ય કરાર નહીં થાય, તો કોઈપણ ક્ષણે વિશાળ અને સંપૂર્ણ તાકાત સાથે હુમલો કરવા માટે સેનાએ તૈયાર રહેવાનું રહેશે. 

આર્થિક અને રાજકીય નિષ્ણાતોના મતે, આ જાહેરાતથી વૈશ્વિક શેરબજાર અને ક્રૂડ ઓઇલના ભાવો પર મોટી અસર જોવા મળી શકે છે અને મધ્ય પૂર્વમાં પણ શાંતિની આશા જાગી છે.