શ્રીનગર, તા.૧૫: રાજધાની નવી દિલ્હી ખાતે યોજાયેલી ૧૮મી BRICS સમિટમાં ભારતને એક મોટી અને ઐતિહાસિક કૂટનીતિક સફળતા સાંપડી છે. સભ્ય દેશો દ્વારા સર્વસંમતિથી અપનાવવામાં આવેલા ૧૪૦ મુદ્દાઓના 'નવી દિલ્હી ઘોષણાપત્ર ૨૦૨૬' માં જમ્મુ-કાશ્મીરના પહેલગામ ખાતે થયેલા ઘાતક આતંકવાદી હુમલાનો સ્પષ્ટ નામજોગ ઉલ્લેખ કરીને તેની આકરા શબ્દોમાં ભર્તસના કરવામાં આવી છે. જમ્મુ-કાશ્મીરના મુખ્યમંત્રી ઓમર અબ્દુલ્લાએ મંગળવારે આ ઘટનાક્રમને ભારત સરકાર અને વિદેશ મંત્રાલયની અદ્ભુત વિદેશ નીતિની વિજયગાથા ગણાવીને મુક્તકંઠે પ્રશંસા કરી છે.

પત્રકારો સાથે વાતચીત કરતી વખતે ઓમર અબ્દુલ્લાએ નોંધ્યું હતું કે, BRICS બેઠકમાં પાકિસ્તાનના કટ્ટર સમર્થક અને સહયોગી ગણાતા દેશો પણ હાજર હતા. તેમ છતાં, કોઈપણ વાંધા વગર પહેલગામ હુમલાનો ઘોષણાપત્રમાં સમાવેશ થવો એ બતાવે છે કે આંતરરાષ્ટ્રીય સ્તરે ભારતનો દબદબો કેટલો મજબૂત થયો છે. વડાપ્રધાન નરેન્દ્ર મોદીએ પણ જાહેરાત કરી હતી કે તમામ દેશોએ આતંકવાદ સામે એકસૂરે અવાજ ઉઠાવ્યો છે અને ઘોષણાપત્રના ૪૦મા મુદ્દામાં સ્પષ્ટ કરાયું છે કે આતંકવાદનું કોઈપણ કૃત્ય ગમે તે ઉદ્દેશ્યથી કરવામાં આવ્યું હોય, તે અસમર્થનીય અને અક્ષમ્ય ગુનો છે.

ઉલ્લેખનીય છે કે, ૨૨ એપ્રિલ ૨૦૨૫ના રોજ જમ્મુ-કાશ્મીરના પહેલગામમાં થયેલા નિર્દયી આતંકી હુમલામાં ૨૬ નિર્દોષ લોકોએ જીવ ગુમાવ્યા હતા. આ કાયરતાપૂર્ણ હુમલાના જવાબમાં ભારતીય સેનાએ 'ઓપરેશન સિંદૂર' લોન્ચ કરીને પાકિસ્તાન અને POK માં આવેલા આતંકવાદી લોન્ચપેડ્સ પર સચોટ અને આકરા પ્રહારો (Precision Strikes) કર્યા હતા. BRICS શિખર સંમેલનમાં સભ્ય દેશોએ આ ઘટના અંગે શોક વ્યક્ત કરવાની સાથે આંતરરાષ્ટ્રીય આતંકવાદ સામે 'ઝીરો ટોલરન્સ' ની નીતિ અપનાવવા અને સંયુક્ત રાષ્ટ્રના વ્યાપક કાનૂની માળખાને ઝડપથી અમલી બનાવવાની જોરદાર હાકલ કરી છે.