બેંગલુરુ:  કર્ણાટકની રાજધાની અને ભારતની સિલિકોન વેલી ગણાતા બેંગલુરુમાં આજે 5મી 'બ્રિક્સ (BRICS) સુપ્રીમ ઓડિટ ઇન્સ્ટિટ્યુશન્સ (SAI) લીડર્સ સમિટ'નો ધમાકેદાર પ્રારંભ થયો છે. "શહેરી ગતિશીલતા (Urban Mobility) પર ધ્યાન કેન્દ્રિત કરીને જીવનની સરળતા" ની થીમ હેઠળ આ બે દિવસીય સંમેલનનું આયોજન કરવામાં આવ્યું છે. ભારતની 2026ની બ્રિક્સ અધ્યક્ષતાના ભાગરૂપે ભારતના કમ્પ્ટ્રોલર એન્ડ ઓડિટર જનરલ (CAG) ની ઓફિસ દ્વારા આ મહત્વની ઇવેન્ટનું આયોજન કરાયું છે.
દુનિયાના 42 પ્રતિનિધિઓ મંથન કરશે
ભારતના CAG કે. સંજય મૂર્તિ દ્વારા આ સમિટનું ઉદ્ઘાટન કરવામાં આવ્યું હતું. આ ખાસ બેઠકમાં બ્રાઝિલ, ચીન, ઇજિપ્ત, ઇથોપિયા, ઇન્ડોનેશિયા, રશિયા, દક્ષિણ આફ્રિકા અને સંયુક્ત આરબ અમીરાત (UAE) જેવા શક્તિશાળી દેશોના કુલ 42 પ્રતિનિધિઓ હાજર રહ્યા છે. આ દિગ્ગજો શહેરી પરિવહન પ્રણાલીને કેવી રીતે વધુ સુવિધાજનક અને પર્યાવરણને અનુકૂળ બનાવી શકાય તે મુદ્દે ઊંડી ચર્ચા કરશે.
વિકાસ અને પર્યાવરણ વચ્ચે સંતુલન
સમિટ દરમિયાન માત્ર રસ્તાઓ અને ટ્રાફિકની જ નહીં, પણ જાહેર સેવા વિતરણ, પર્યાવરણીય ટકાઉપણું અને ઓડિટ કરવાની પદ્ધતિઓને વધુ મજબૂત કરવા પર ભાર મૂકવામાં આવશે. બદલાતા સમય સાથે શહેરોમાં વસતા લોકોનું જીવન કેવી રીતે સરળ બને તે માટે આ દેશો એકબીજાના અનુભવો અને ટેકનોલોજીની આપ-લે કરશે.
‘બેંગલુરુ ઘોષણાપત્ર’ પર સૌની નજર
આ સમિટના અંતે આગામી સમય માટે 'BRICS SAI વર્ક પ્લાન 2027-28' અને ‘બેંગલુરુ ઘોષણાપત્ર’ (Bengaluru Declaration) સ્વીકારવામાં આવશે. આ દસ્તાવેજ બ્રિક્સ દેશોમાં ભવિષ્યના વિકાસકાર્યો અને ઓડિટિંગમાં પારદર્શિતા લાવવા માટે પથદર્શક સાબિત થશે.