સાઉથ કોરિયાએ પોતાનો પહેલો હ્યુમનૉઇડ રોબોટ રજૂ કર્યો છે. તેનું નામ ‘ગાબી’ રાખવામાં આવ્યું છે અને તે દુનિયાનો પહેલો હ્યુમનૉઇડ રોબોટ ભિક્ષુ છે. રાજધાની સિઓલના જોગ્યે મંદિરમાં એક દીક્ષા સમારોહમાં આ રોબોટને ઔપચારિક રીતે બૌદ્ધ ધર્મના શિષ્ય તરીકે સામેલ કરવામાં આવ્યો.

AI અને ધર્મના આ મેળાપનો વીડિયો વાઇરલ થઈ રહ્યો છે. વીડિયોમાં રોબોટ ટ્રેડિશનલ પહેરવેશ પહેરીને સ્ટેજ સામે આવે છે, જ્યાં તેને માળા પહેરાવીને દીક્ષા માટે શિષ્ય બનાવવાની શરૂઆત કરવામાં આવી. રોબોટને બુદ્ધ પૂર્ણિમાના ઉત્સવમાં પણ રજૂ કરવામાં આવશે.

ચીનના Unitree G1 હ્યુમનૉઇડ પ્લેટફોર્મ પર આધારિત 'ગાબી'નું શરીર મનુષ્યો જેવું છે. તે સરળતાથી ચાલી શકે છે અને ઇશારામાં વાત કરી શકે છે. તે મંત્રોચ્ચાર કરવા અને વિધિઓમાં નમીને પ્રણામ કરવામાં પણ સક્ષમ છે. ગાબીને દક્ષિણ કોરિયાના સૌથી મોટા બૌદ્ધ સંપ્રદાય 'જોગ્યે ઓર્ડર' દ્વારા વિકસાવવામાં આવ્યું છે. તેનો મુખ્ય ઉદ્દેશ્ય ડિજિટલ યુગમાં બૌદ્ધ ધર્મને આધુનિક બનાવવાનો અને યુવા પેઢીને ધર્મ સાથે જોડવાનો છે.

130 સેન્ટિમીટર લાંબા રોબોટે ભિક્ષુઓ દ્વારા પહેરવામાં આવતો પરંપરાગત ગ્રે અને ભૂરા રંગનો પહેરવેશ પહેર્યો હતો. જ્યારે એક વરિષ્ઠ ભિક્ષુએ ગાબીને પૂછ્યું કે શું તે પોતાને બૌદ્ધ ધર્મ માટે સમર્પિત કરશે, ત્યારે રોબોટે જવાબ આપ્યો, 'હા, હું પોતાને સમર્પિત કરીશ.' આ પછી રોબોટે હાથ જોડીને બધાની સામે માથું નમાવ્યું અને વરિષ્ઠ ભિક્ષુઓએ તેના ગળામાં 108 મોતીની માળા પહેરાવી.

સામાન્ય રીતે જ્યારે કોઈ વ્યક્તિ ભિક્ષુ બને છે, ત્યારે તેના માથા પર અગરબત્તીથી પ્રતીકાત્મક નિશાન બનાવવામાં આવે છે, પરંતુ રોબોટના કિસ્સામાં તેની જગ્યાએ એક પ્રતીકાત્મક સ્ટીકરનો ઉપયોગ કરવામાં આવ્યો.

જોગ્યે ઓર્ડર અનુસાર, 'ગાબી' નામ ગૌતમ બુદ્ધના બાળપણના નામ 'સિદ્ધાર્થ' અને કોરિયન ભાષાના શબ્દ 'દયા' ને જોડીને બનાવવામાં આવ્યું છે. તેને એવી રીતે ડિઝાઇન કરવામાં આવ્યું છે કે તેનો ઉચ્ચાર સરળ રહે અને તે બુદ્ધની કરુણાનો સંદેશ ફેલાવી શકે.