કાંગરા: પવિત્ર અમરનાથ યાત્રાનું પુણ્ય ભાથું બાંધીને હર્ષોલ્લાસ સાથે પરત ફરી રહેલા શ્રદ્ધાળુઓ માટે રવિવારની મોડી રાત કાળમુખી સાબિત થઈ છે. હિમાચલ પ્રદેશના કાંગરા જિલ્લામાં નેશનલ હાઇવે ૪૪ (NH-44) પર દમતાલ પોલીસ સ્ટેશનની હદમાં એક ભયાનક અકસ્માત સર્જાયો હતો. જમ્મુ-કાશ્મીરના કટરાથી ઉત્તરાખંડના દેહરાદૂન તરફ જઈ રહેલી 'લક્ષ્મી હોલિડેઝ'ની લક્ઝરી પ્રવાસી બસના ચાલકે અચાનક સ્ટેયરિંગ પરથી કાબૂ ગુમાવી દીધો હતો. કાબૂ બહાર ગયેલી આ હાઈ-સ્પીડ બસ હાઈવે પર જ પલટી ખાઈ જતાં ચીસાચીસ અને અફડાતફડી મચી ગઈ હતી. બસમાં સવાર કુલ ૫૭ મુસાફરોમાંથી ૧૭ યાત્રાળુઓ ગંભીર રીતે ઘાયલ થયા છે, જ્યારે ચાર શ્રદ્ધાળુઓની હાલત અત્યંત નાજુક હોવાનું જાણવા મળ્યું છે.

આ ભયાનક દ્રશ્યો વચ્ચે હાઈવે પરથી પસાર થઈ રહેલા આર્ની યુનિવર્સિટીના વાઇસ ચાન્સેલર (કુલપતિ) ડૉ. વિવેક સિંહ યાત્રાળુઓ માટે સાક્ષાત દેવદૂત બનીને સામે આવ્યા હતા. અકસ્માત જોતાની સાથે જ તેમણે પોતાની ગાડી થોભાવી દીધી હતી અને પોતાના સાથીદારો સાથે બસની બારીઓ તોડીને મુસાફરોને બહાર કાઢવાનું ભગીરથ કામ શરૂ કર્યું હતું. એટલું જ નહીં, ડૉ. વિવેક સિંહે તાત્કાલિક પોતાની યુનિવર્સિટીની ખાનગી એમ્બ્યુલન્સ અને સ્પેશિયલ મેડિકલ ટીમને પણ ઘટનાસ્થળે બોલાવી લીધી હતી. સ્થાનિક લોકો, પોલીસ અને યુનિવર્સિટીની ટીમે ભેગા મળીને ઘાયલોને તાત્કાલિક સારવાર માટે નજીકની હોસ્પિટલમાં ખસેડ્યા હતા, જ્યારે વધુ ગંભીર ચાર મુસાફરોને ટાંડા સ્થિત ડૉ. રાજેન્દ્ર પ્રસાદ સરકારી મેડિકલ કોલેજમાં કટોકટીની સારવાર હેઠળ રાખવામાં આવ્યા છે.

અકસ્માતની આ ભયાનકતા વચ્ચે બસના ડ્રાઇવર અને કંડક્ટરે માનવતા નેવે મૂકી હતી. મુસાફરો જ્યારે લોહીલુહાણ હાલતમાં મદદ માટે આજીજી કરી રહ્યા હતા, ત્યારે આ બંને શખ્સો અંધારાનો લાભ ઉઠાવીને ઘટનાસ્થળેથી રફુચક્કર થઈ ગયા હતા. હિમાચલ પ્રદેશના મુખ્યમંત્રીએ આ દુર્ઘટના પર ઊંડા શોકની લાગણી વ્યક્ત કરી ઘાયલોને તમામ સંભવિત મફત સારવાર આપવાની જાહેરાત કરી છે. બીજી તરફ, દમતાલ પોલીસે મોટર વાહન અધિનિયમ  હેઠળ ગુનો નોંધીને ફરાર ડ્રાઈવર-કંડક્ટરની શોધખોળ માટે ચક્રો ગતિમાન કર્યા છે. અકસ્માત કોઈ મોટી ટેકનિકલ ખામી કે બ્રેક ફેલ થવાને કારણે થયો હતો કે પછી ડ્રાઈવરની બેદરકારી અને નશાખોરીનું પરિણામ છે, તે દિશામાં પોલીસે એફએસએલની મદદથી ઊંડી તપાસ શરૂ કરી છે.