નવી દિલ્હી, તા.૦૬: ચાર્ટર્ડ એકાઉન્ટન્ટ (CA) બનવાનું સ્વપ્ન સેવતા લાખો વિદ્યાર્થીઓ માટે અત્યંત મહત્વના સમાચાર સામે આવ્યા છે, જ્યાં ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા (ICAI) દ્વારા CA ફાઉન્ડેશન સપ્ટેમ્બર ૨૦૨૬ની પરીક્ષાનું સત્તાવાર પરિણામ જાહેર કરી દેવામાં આવ્યું છે.

જાહેર કરાયેલા પરિણામની વિગતો અનુસાર, કન્સિકા અને મહેક ગુપ્તાએ ૯૦.૨૫ ટકા ગુણ પ્રાપ્ત કરીને સંયુક્ત રીતે સમગ્ર દેશમાં પ્રથમ સ્થાન (AIR-1) મેળવીને ઐતિહાસિક સિદ્ધિ હાંસલ કરી છે, જ્યારે સ્પર્શ ખંડેલવાલ અને જે. જયંતે ૮૯.૭૫ ટકા સાથે દ્વિતીય તથા વૈભવી સિંઘલે ૮૯.૫૦ ટકા ગુણ સાથે તૃતીય ક્રમ પ્રાપ્ત કર્યો છે.

આંકડાકીય વિગતો મુજબ, ૨, ૫, ૭ અને ૯ સપ્ટેમ્બરના રોજ યોજાયેલી આ પરીક્ષામાં દેશભરમાંથી કુલ ૧,૦૪,૨૪૦ ઉમેદવારોએ ભાગ લીધો હતો, જેમાં ૫૩,૩૯૮ પુરુષ અને ૫૦,૮૪૨ મહિલા ઉમેદવારોનો સમાવેશ થાય છે.

કુલ પરીક્ષાર્થીઓમાંથી માત્ર ૧૯,૭૩૬ ઉમેદવારો જ સફળ થયા છે, જેમાંથી ૧૦,૯૩૧ પુરુષ અને ૮,૮૦૫ મહિલા ઉમેદવારો પાસ થતાં આ વખતે પરીક્ષાનું સરેરાશ પાસિંગ પરિણામ ૧૯ ટકાથી પણ નીચું નોંધાયું છે, જે પરીક્ષાની કઠિનતા દર્શાવે છે.

પરીક્ષામાં સામેલ થયેલા તમામ ઉમેદવારો હવે ICAIની સત્તાવાર વેબસાઇટ caresults.icai.org પર જઈને પોતાનો રોલ નંબર અને જરૂરી વિગતો દાખલ કરીને સરળતાથી ઓનલાઈન માર્કશીટ જોઈ તેમજ ડાઉનલોડ કરી શકશે.
 

પરિણામ જાહેર થયા બાદ ICAIના અધ્યક્ષ CA પ્રસન્ના કુમાર ડીએ સફળ થયેલા તમામ ઉમેદવારો, તેમના માતા-પિતા અને માર્ગદર્શકોને હાર્દિક અભિનંદન પાઠવીને CA બનવાની તેમની આગળની સફર માટે શ્રેષ્ઠ શુભેચ્છાઓ પાઠવી હતી.