અશ્વિન વ્યાસ દ્વારા, ગાંધીનગર: ઈઝરાયલ જઈ રહેલી ફ્લાઈટ પર થયેલા હુમલા દરમિયાન પોતાના અદમ્ય સાહસ અને સુઝબુઝથી ૧૭૪ મુસાફરોના જીવ બચાવનારા મૂળ ગુજરાતના પાયલટ કેપ્ટન સ્મિત મચ્છરની વીરતાને આજે આખી દુનિયા સલામ કરી રહી છે. હુમલામાં પોતે ગંભીર રીતે ઘવાયેલા અને લોહીલુહાણ હોવા છતાં, તેમણે પોતાની પ્રાણની પરવા કર્યા વિના તમામ પ્રવાસીઓને સુરક્ષિત ઉગારીને માનવતા અને શૌર્યનું અદ્ભુત ઉદાહરણ પૂરું પાડ્યું છે.

ગુજરાતના આ વીર સપૂતે પોતાની રગોમાં વહેતી ગુજરાતી ખુમારી અને અસાધારણ બહાદુરીથી સમગ્ર વિશ્વમાં ગુજરાત અને ભારત દેશનું નામ રોશન કર્યું છે. તેમના આ અત્યંત પ્રેરણાદાયી અને સરાહનીય કાર્યાન્વિત સાહસની ચારેકોર પ્રશંસા થઈ રહી છે.

કેપ્ટન સ્મિત મચ્છરના આ અસાધારણ શૌર્ય, બહાદુરી અને માનવતાના ઉત્કૃષ્ટ કાર્યને બિરદાવવા તથા સન્માનિત કરવા માટે ગુજરાત સરકારે એક મહત્વનો નિર્ણય લીધો છે. રાજ્ય સરકાર દ્વારા તેમને 'વિશિષ્ટ ગુજરાત ગરિમા એવોર્ડ'થી સન્માનિત કરવામાં આવશે.

ઈજાગ્રસ્ત કેપ્ટન સ્મિત મચ્છર ઝડપથી સાજા થઈ જાય તે માટે સમગ્ર ગુજરાત અને દેશવાસીઓ એકજૂથ થઈને પ્રાર્થના કરી રહ્યા છે. સમગ્ર દેશની સંવેદનાઓ અને શુભેચ્છાઓ આ વીર પાયલટની સાથે છે.