નવી દિલ્હી, તા. 16 :NEET UG પેપર લીક કેસમાં CBIએ મોટી કાર્યવાહી કરતા પુણેની એક ખાનગી કોચિંગ ક્લાસની બોટની શિક્ષિકાની ધરપકડ કરી છે. આ ધરપકડ સાથે આ કેસમાં અત્યાર સુધીમાં ઝડપાયેલા આરોપીઓની સંખ્યા 9 થઈ ગઈ છે. CBIના જણાવ્યા મુજબ આરોપી શિક્ષિકા વિદ્યાર્થીઓને પરીક્ષા શરૂ થવાના કલાકો પહેલા જ પ્રશ્નપત્રના ઉકેલેલ જવાબો મોકલવામાં સામેલ હતી.

CBI સૂત્રોના જણાવ્યા મુજબ આરોપી મહિલા પુણેના કોથરુડ વિસ્તારમાં આવેલા એક જાણીતા NEET કોચિંગ સેન્ટરમાં બોટની વિષય ભણાવતી હતી. તપાસમાં સામે આવ્યું કે પેપર લીક કૌભાંડના મુખ્ય સૂત્રધાર સાથે તે સીધા સંપર્કમાં હતી. પરીક્ષાના આગલા દિવસે રાત્રે મુખ્ય આરોપી પાસેથી પેપર મેળવીને તેણે પોતાના 12 જેટલા વિદ્યાર્થીઓને વ્હોટ્સએપ ગ્રુપ પર ઉકેલેલ પ્રશ્નપત્ર મોકલ્યા હતા. આ માટે દરેક વિદ્યાર્થી પાસેથી 35થી 40 લાખ રૂપિયા રોકડા લેવામાં આવ્યા હતા.

CBIએ ગઈકાલે મોડી રાત્રે પુણેમાં શિક્ષિકાના ઘરે અને કોચિંગ સેન્ટર પર દરોડા પાડ્યા હતા. દરોડા દરમિયાન ઘરમાંથી એક લેપટોપ, ત્રણ મોબાઈલ ફોન અને કેટલાક બેંક દસ્તાવેજો કબજે કરવામાં આવ્યા છે. મોબાઈલમાંથી ડિલીટ કરેલા વ્હોટ્સએપ ચેટના ડેટા રિકવર કરવા માટે ઉપકરણોને ફોરેન્સિક તપાસ માટે મોકલવામાં આવ્યા છે. પ્રાથમિક તપાસમાં શિક્ષિકાના ખાતામાં શંકાસ્પદ રીતે 2.8 કરોડ રૂપિયાના વ્યવહારો મળી આવ્યા છે.

આ કેસમાં CBIએ અગાઉ બિહાર, ગુજરાત અને રાજસ્થાનથી 8 આરોપીઓની ધરપકડ કરી હતી. જેમાં પેપર છાપનાર પ્રેસના કર્મચારી, કોચિંગ સંચાલક અને વચેટિયાઓનો સમાવેશ થાય છે. CBIનું કહેવું છે કે આ સમગ્ર કૌભાંડમાં આંતરરાજ્ય ગેંગ સક્રિય છે અને વધુ લોકોની સંડોવણી બહાર આવી શકે છે. ધરપકડ કરાયેલ શિક્ષિકાને આજે પુણેની વિશેષ CBI કોર્ટમાં રજૂ કરવામાં આવશે. એજન્સી આરોપીના 10 દિવસના રિમાન્ડની માંગ કરશે.