મુંબઈ : સેન્ટ્રલ બ્યુરો ઓફ ઇન્વેસ્ટિગેશન (CBI) એ આંતરરાષ્ટ્રીય તપાસ એજન્સીઓ સાથે મજબૂત સંકલન સાધીને એક મોટી સફળતા હાંસલ કરી છે. યુએઈ (UAE) અને સાઉદી અરેબિયા ખાતેથી ઇન્ટરપોલની 'રેડ નોટિસ' હેઠળ વોન્ટેડ એવા બે ગંભીર ગુનેગારોને સફળતાપૂર્વક ડિપોર્ટ (દેશનિકાલ) કરાવીને ભારત લાવવામાં આવ્યા છે.

મોટા પાયે નાણાકીય છેતરપિંડી આચરનાર અવિનાશ રાઠોડ સકંજામાં

CBI ના સૂત્રોના જણાવ્યા મુજબ, વિદેશ મંત્રાલય (MEA) અને ગૃહ મંત્રાલય (MHA) ના સહયોગથી કરોડો રૂપિયાની નાણાકીય છેતરપિંડીના આરોપી અવિનાશ અર્જુન રાઠોડને સંયુક્ત આરબ અમીરાત (UAE) થી ભારત લવાયો છે. ગુરુવારે મુંબઈ પહોંચતાં જ મહારાષ્ટ્ર પોલીસની ટીમે તેની કસ્ટડી મેળવી લીધી હતી.

·         ગુનાની પદ્ધતિ: અવિનાશ રાઠોડે અન્ય સાગરીતો સાથે મળીને રોકાણકારોને દર મહિને નિશ્ચિત આકર્ષક વળતર આપવાની લાલચ આપીને વિવિધ યોજનાઓમાં રોકાણ કરાવ્યું હતું. ત્યારબાદ આ ભંડોળનો અપ્રમાણિક રીતે દુરુપયોગ કરી અનેક બેંક ખાતાઓ તથા ડીમેટ ખાતાઓમાં રકમ ડાયવર્ટ કરી દીધી હતી. તેની સામે ઇન્ટરપોલ દ્વારા રેડ નોટિસ જાહેર કરવામાં આવી હતી.

ગેરકાયદેસર પ્રવૃત્તિઓ અને હત્યાના કેસમાં વોન્ટેડ મુહમ્મદલી સાઉદી અરેબિયાથી ડિપોર્ટ

બીજા એક મહત્વપૂર્ણ ઓપરેશનમાં, CBI એ એનઆઈએ (NIA) સાથે સંકલન કરીને ગેરકાયદેસર પ્રવૃત્તિઓ અને હત્યાના કેસમાં વોન્ટેડ આરોપી મુહમ્મદલી કન્નીર પલ્લીયાલિલને સાઉદી અરેબિયાથી ભારત લવવામાં સફળતા મેળવી છે.

·         હત્યાનું કાવતરું: પલ્લીયાલિલ પર પોતાના સાથીઓ સાથે મળીને ઘાતક શસ્ત્રો સાથે પીડિતની દુકાનમાં ઘૂસી, તેને ગેરકાયદેસર રીતે રોકીને ગંભીર ઇજાઓ પહોંચાડી ક્રૂરતાપૂર્વક હત્યા કરવાનો આક્ષેપ છે. NIA ની વિનંતી પર CBI એ ઇન્ટરપોલ દ્વારા તેની સામે રેડ નોટિસ જારી કરાવી હતી. સાઉદી અરેબિયામાં લોકેશન મળ્યા બાદ સાઉદી અધિકારીઓએ તેની ધરપકડ કરી હતી અને પ્રત્યાર્પણની પ્રક્રિયા પૂરી કરીને તેને ભારતીય એજન્સીઓને સોંપવામાં આવ્યો છે.