બેરૂત: ઇઝરાયલ અને ઈરાન સમર્થિત લેબનીઝ આતંકવાદી જૂથ હિઝબુલ્લાહ વચ્ચે ગયા મહિને થયેલા નાજુક યુદ્ધવિરામના લીરેલીરા ઉડી ગયા છે. શુક્રવારે મોડી રાત્રે અને શનિવારે સવારે ઇઝરાયલી વાયુસેનાએ દક્ષિણ લેબનોન પર ડઝનબંધ વિનાશક હવાઈ હુમલા (Air Strikes) કરીને સમગ્ર વિસ્તારને ધણધણાવી મૂક્યો છે. આ તાજા સૈન્ય ઓપરેશનમાં અનેક નિર્દોષ નાગરિકો સહિત તબીબી કર્મચારીઓ (પેરામેડિક્સ) ના કમકમાટીભર્યા મોત નીપજ્યા છે. શનિવારના આ ગોઝારા હુમલાઓએ લેબનોનના ઐતિહાસિક ટાયર (Tyre) શહેરની એક મુખ્ય હોસ્પિટલને પણ ગંભીર નુકસાન પહોંચાડ્યું છે, જેના કારણે યુદ્ધવિરામ ભંગ થવાની અને ફરી મોટો પ્રાદેશિક સંગ્રામ ફાટી નીકળવાની દહેશત ઊભી થઈ છે.

સૌથી હૃદયદ્રાવક દ્રશ્યો ત્યારે સર્જાયા જ્યારે એક દિવસ પહેલા ઇઝરાયલી હુમલામાં માર્યા ગયેલા પેરામેડિક્સ અને નાગરિક સંરક્ષણ કર્મચારીઓના અંતિમ સંસ્કાર ચાલી રહ્યા હતા. લીલા, સફેદ અને લાલ કાપડમાં લપેટાયેલા શબોને લઈને વિલાપ કરી રહેલા શોકગ્રસ્તોના માથા પર જ ઇઝરાયલી ફાઇટર જેટ્સ બોમ્બ વરસાવી રહ્યા હતા. લેબનોનના આરોગ્ય મંત્રાલયના સત્તાવાર આંકડા મુજબ, છેલ્લા ૨૪ કલાકમાં જ દક્ષિણ લેબનોનમાં બે અલગ-અલગ ઘટનાઓમાં ઇઝરાયલી હુમલા દરમિયાન છ પેરામેડિક્સ સજીવન ભૂંજાયા છે. આ સાથે જ તાજેતરના સંઘર્ષમાં અત્યાર સુધીમાં ૧૨૦થી વધુ મેડિકલ સ્ટાફના સભ્યોએ પોતાના જીવ ગુમાવ્યા છે, જે આંતરરાષ્ટ્રીય માનવતાવાદી કાયદાનું સરેઆમ ઉલ્લંઘન છે.

મોટરસાયકલ સવારોને નિશાન બનાવ્યા હોવાનો ઇઝરાયલનો દાવો

આ ભયાનક રક્તપાત અંગે ઇઝરાયલી સૈન્ય (IDF) એ એક નિવેદન જારી કરીને પોતાની સફાઈ રજૂ કરી છે. સૈન્યના જણાવ્યા અનુસાર, 'દેઇર કાનુન અન-નાહર' વિસ્તારમાં મોટરસાયકલ પર જઈ રહેલા હિઝબુલ્લાહના સક્રિય આતંકવાદીઓને ચોક્કસ બાતમીના આધારે નિશાન બનાવવામાં આવ્યા હતા. આ ઉપરાંત 'હનોઇયેહ' માં પણ હિઝબુલ્લાહના સૈન્ય માળખા પર ત્રાટકીને આતંકવાદીઓનો સફાયો કરવામાં આવ્યો હતો. જોકે, આ હુમલાઓમાં "ઘણા બિનસંબંધિત વ્યક્તિઓ" અને સામાન્ય નાગરિકો ભોગ બન્યા હોવાના અહેવાલો બાદ ઇઝરાયલી સૈન્યએ આ મામલે તપાસ શરૂ કરી હોવાનું નાટક કર્યું છે.

સમગ્ર લેબનોનમાં અનિશ્ચિતતા અને નવો હિજરતનો દોર

એપ્રિલના મધ્યમાં આંતરરાષ્ટ્રીય મધ્યસ્થીઓ દ્વારા કરાવવામાં આવેલો યુદ્ધવિરામ અઠવાડિયાની હિંસાને હળવી કરવા માટે હતો, પરંતુ ઇઝરાયલના રોજિંદા હુમલાઓએ સ્થાનિક લોકોનું જનજીવન નરક સમાન બનાવી દીધું છે. ઇઝરાયલી સૈન્યએ શનિવારે બપોરે દક્ષિણ લેબનોનના કેટલાય શહેરો માટે નવી કડક સ્થળાંતર ચેતવણીઓ (Evacuation Alerts) જારી કરી છે, જેના કારણે હજારો પરિવારો ફરી એકવાર પોતાના ઘરબાર છોડીને ભાગવા મજબૂર બન્યા છે. પ્રાદેશિક મધ્યસ્થીઓ આ કામચલાઉ શાંતિને કાયમી કરારમાં બદલવા મથી રહ્યા છે, પરંતુ અમેરિકા અને ઇઝરાયલના આ આક્રમક વલણથી પશ્ચિમ એશિયા ફરી એકવાર મોટી યુદ્ધની જ્વાળાઓમાં હોમાઈ જાય તેવી ગંભીર કટોકટી સર્જાઈ છે.