ન્યૂ યોર્ક, તા.૧૭: પોતાની અસાધારણ અને સ્વાદિષ્ટ રાંધણકળા (Culinary Arts) દ્વારા વૈશ્વિક સ્તરે ભારતનું નામ રોશન કરનાર મિશેલિન-સ્ટાર સેલિબ્રિટી શેફ વિકાસ ખન્ના ફરી એકવાર ચર્ચામાં આવ્યા છે. જોકે આ વખતે ચર્ચા તેમની કોઈ નવી વાનગીની નહીં, પરંતુ તેમની નમ્રતા, હૂંફ અને ભારતીય સંસ્કારોની થઈ રહી છે. ન્યૂ યોર્ક શહેરમાં આવેલી તેમની પ્રખ્યાત રેસ્ટોરન્ટ 'બંગલો' (Bungalow) માં આવતા દરેક મહેમાન પ્રત્યેનો તેમનો આદરભાવ જગજાહેર છે, પરંતુ તાજેતરમાં જન્મેલી એક હૃદયસ્પર્શી ક્ષણે ઇન્ટરનેટ પર લોકોના દિલ જીતી લીધા છે.

રેસ્ટોરન્ટ 'બંગલો' ની મુલાકાત દરમિયાન શેફ વિકાસ ખન્નાએ જાણીતા આધ્યાત્મિક લેખક, વક્તા અને કલાકાર હર ગ્રેસ શ્રીમતી શ્યામરાણી દાસીનું અત્યંત ઉષ્માભર્યું સ્વાગત કર્યું હતું. વિકાસ ખન્નાએ પોતાની વ્યસ્ત દિનચર્યામાંથી ખાસ સમય કાઢીને ન માત્ર તેમનું વ્યક્તિગત રીતે સ્વાગત કર્યું, પરંતુ તેમને આખી રેસ્ટોરન્ટની મુલાકાત કરાવી અને તેમની સાથે મન મૂકીને વાર્તાલાપ પણ કર્યો હતો.

ઓળખાણ આપ્યા વગર જ શેફે આપ્યો અપ્રતિમ આદર

આ મુલાકાત ત્યારે વધુ ખાસ અને ભાવુક બની ગઈ જ્યારે શ્રીમતી શ્યામરાણી દાસીએ શેફ વિકાસ ખન્નાને પોતાનું એક આર્ટ બુક (કલા પુસ્તક) ભેટ સ્વરૂપે આપ્યું. સામાન્ય રીતે વૈશ્વિક સેલિબ્રિટીઝ આધ્યાત્મિક હસ્તીઓથી અજાણ હોય છે, પરંતુ વિકાસ ખન્નાએ પુસ્તક જોતા જ તુરંત તેમને ઓળખી કાઢ્યા હતા. તેમણે ભારે આદર સાથે વ્યક્ત કર્યું કે તેઓ શ્યામરાણી દાસીના કાર્યો અને કલાથી પહેલેથી જ ખૂબ સારી રીતે પરિચિત છે. રાંધણ જગતના આ દિગ્ગજ કલાકારનો કલા, સંસ્કૃતિ અને આધ્યાત્મિકતા પ્રત્યેનો આ ગહન આદર જોઈને ત્યાં હાજર તમામ લોકો ગદગદ થઈ ગયા હતા. સોશિયલ મીડિયા પર આ મુલાકાતના ફોટો અને વીડિયો વાયરલ થતાં જ લોકો શેફની નમ્રતાના વખાણ કરતા થાકતા નથી.

CA બનેલી ભારતીય દીકરીને આપી હતી અનોખી સરપ્રાઈઝ

વિકાસ ખન્ના માટે 'અતિથિ દેવો ભવઃ' માત્ર એક કહેવત નથી, પણ તેમનો સ્વભાવ છે. આ પહેલા પણ આવી જ એક ઘટના સોશિયલ મીડિયા પર વાયરલ થઈ હતી. તાજેતરમાં જ ફિટનેસ કન્ટેન્ટ ક્રિએટર વિધિ દહાડે એક વીડિયો શેર કર્યો હતો. વિધિ અને તેનો પરિવાર 'બંગલો' રેસ્ટોરન્ટમાં જમી રહ્યા હતા અને વિધિ શેફ વિકાસ ખન્નાને મળવાની આશાએ વીડિયો રેકોર્ડ કરી રહી હતી. તેને રેકોર્ડિંગ કરતી જોઈને વિકાસ ખન્ના પોતે હસતા હસતા તેમના ટેબલ સુધી આવ્યા અને મજાકમાં તેને "ઇન્ફ્લુએન્સર" કહીને બોલાવી.

વાતચીત દરમિયાન જ્યારે વિધિની બહેને જણાવ્યું કે તેણે તાજેતરમાં જ ભારતની સૌથી અઘરી ગણાતી ચાર્ટર્ડ એકાઉન્ટન્સી (CA) ની પરીક્ષા પાસ કરી છે, ત્યારે વિકાસ ખન્નાના આનંદનો પાર ન રહ્યો. તેમણે આ સિદ્ધિની ઉજવણી કરવા માટે રસોડામાંથી ખાસ તૈયાર કરેલી સેલિબ્રેશન સ્વીટ ડિશ (મીઠાઈ) અને સળગતી મીણબત્તી મંગાવીને આખા પરિવારને ચોંકાવી દીધો હતો. એટલું જ નહીં, તેમણે તે ખાસ મીઠાઈ કઈ રીતે બનાવવામાં આવી છે તે પણ પરિવારને ખૂબ જ રસપૂર્વક સમજાવ્યું હતું. વિકાસ ખન્નાનો આ દયાળુ અને આપનાપન વાળો યજમાન ધર્મ સાબિત કરે છે કે કેમ તેઓ દુનિયાભરમાં આટલા લોકપ્રિય છે.