નવી દિલ્હી : દેશભરમાં ખળભળાટ મચાવનારા NEET-UG 2026 પેપર લીક વિવાદ અને કરોડો વિદ્યાર્થીઓના આક્રોશ વચ્ચે કેન્દ્ર સરકારે નેશનલ ટેસ્ટિંગ એજન્સી (NTA) ના ધબકતા માળખાને બેઠું કરવા અને પરીક્ષા પ્રણાલીમાં પારદર્શિતા લાવવા માટે એક બહુ મોટી વહીવટી સર્જિકલ સ્ટ્રાઈક કરી છે. વડાપ્રધાન નરેન્દ્ર મોદીના નેતૃત્વ હેઠળની કેબિનેટ નિમણૂક સમિતિ (ACC) એ શનિવારે મોડી સાંજે એક અત્યંત મહત્વપૂર્ણ નિર્ણય લઈને દેશના ૪ ટોચના અને બાહોશ સનદી અધિકારીઓને તાત્કાલિક પ્રભાવથી એનટીએ (NTA) ના સંચાલનની મહત્વની કમાન સોંપી દીધી છે. પર્સનલ એન્ડ ટ્રેનિંગ વિભાગ (DoPT) દ્વારા આ અંગેનો સત્તાવાર આદેશ જાહેર કરી દેવામાં આવ્યો છે.

વહીવટ મજબૂત કરવા ૨ મહિલા અધિકારીઓ બન્યા જોઈન્ટ સેક્રેટરી

કેન્દ્ર સરકારના ઉચ્ચ સ્તરીય આદેશ અનુસાર, નેશનલ ટેસ્ટિંગ એજન્સીની આંતરિક વહીવટી વ્યવસ્થા અને નીતિ વિષયક નિર્ણયોને લોખંડી બનાવવા માટે બે વરિષ્ઠ મહિલા અધિકારીઓને સંયુક્ત સચિવ (Joint Secretary) તરીકે નિયુક્ત કરવામાં આવ્યા છે. આમાં ૧૯૯૮ બેચના આઈએસએસ (ISS) અધિકારી અનુજા બાપટ અને ૨૦૦૪ બેચના આઈઆરએસ (IRS) અધિકારી રુચિતા વિજ સામેલ છે. આ બંને અનુભવી મહિલા અધિકારીઓ ઉચ્ચ શિક્ષણ વિભાગ (Higher Education Department) હેઠળ આગામી ૫ વર્ષ સુધી પોતાની કડક સેવાઓ આપશે, જેથી ભવિષ્યમાં પેપર લીક જેવી મોટી ક્ષતિઓ અને ભ્રષ્ટાચારને સંપૂર્ણપણે નાબૂદ કરી શકાય.

લેટરલ શિફ્ટ દ્વારા ૨ નીડર અધિકારીઓને જોઈન્ટ ડિરેક્ટરની કમાન

એનટીએના નબળા પડેલા સેન્ટ્રલ સ્ટાફિંગ અને પરીક્ષા મોનિટરિંગ સિસ્ટમને સખત કરવા માટે કેન્દ્ર સરકારે 'લેટરલ શિફ્ટ' (બદલી) પ્રક્રિયાનો ઉપયોગ કરીને બે લોકપ્રિય અને પરિણામલક્ષી અધિકારીઓની સંયુક્ત નિયામક (Joint Director) તરીકે તાત્કાલિક વરણી કરી છે. જેમાં ૨૦૧૩ બેચના આઈઆરએસ (IRS) અધિકારી આકાશ જૈન ૪ ડિસેમ્બર ૨૦૨૯ સુધી આ મહત્વના પદ પર રહેશે. જ્યારે તેમની સાથે જ ૨૦૧૩ બેચના આઈએએન્ડએએસ (IA&AS) કેડરના કડક અધિકારી આદિત્ય રાજેન્દ્ર ભોજગઢિયાને ૧૬ મે ૨૦૨૮ સુધી જોઈન્ટ ડિરેક્ટર તરીકે એજન્સીની જાસૂસી અને સુરક્ષા વ્યવસ્થા મજબૂત કરવાની જવાબદારી સોંપાઈ છે.

PMO અને ગૃહ મંત્રાલય રાખશે સીધી નજર:

નેશનલ ટેસ્ટિંગ એજન્સીમાં થયેલી આ નિમણૂકો સામાન્ય વહીવટી પ્રક્રિયા નથી, પરંતુ પેપર લીક માફિયાઓ સામે કેન્દ્ર સરકારનો એક ખુલ્લો પડકાર છે. આ કડક આદેશની નકલ પીએમઓ (PMO - વડાપ્રધાન કાર્યાલય) અને કેન્દ્રીય ગૃહ મંત્રાલયને સીધી મોકલી દેવામાં આવી છે. સરકારનો મુખ્ય ઉદ્દેશ્ય આગામી સમયમાં યોજાનારી તમામ રાષ્ટ્રીય સ્તરની સ્પર્ધાત્મક પરીક્ષાઓ કોઈ પણ પ્રકારની ગેરરીતિ વિના, સંપૂર્ણ ડિજિટલ સુરક્ષા અને પારદર્શિતા સાથે યોજાય તે સુનિશ્ચિત કરવાનો છે. વિપક્ષના આકરા પ્રહારો વચ્ચે કેન્દ્રનો આ નિર્ણય શૈક્ષણિક તંત્રમાં એક મોટો વળાંક સાબિત થઈ શકે છે.