નવી દિલ્હી: કેન્દ્રીય મંત્રીમંડળે વડાપ્રધાન નરેન્દ્રભાઈ મોદીના સરકારના વડા તરીકે સતત ૨૫ વર્ષના નેતૃત્વને અભિનંદન આપતો ઠરાવ પસાર કર્યો છે. ઠરાવમાં ગુજરાતના મુખ્યમંત્રીથી દેશના વડાપ્રધાન સુધીની તેમની કામગીરી અને ‘રાષ્ટ્ર પ્રથમ, નાગરિક પ્રથમ’ના અભિગમને બિરદાવવામાં આવ્યો છે.
ઠરાવમાં ગુજરાતની ‘સ્વાગત’ ફરિયાદ નિવારણ વ્યવસ્થા અને ‘જ્યોતિગ્રામ’ જેવી પહેલોનો ઉલ્લેખ છે. આ અનુભવો રાષ્ટ્રીય સ્તરે ફરિયાદ નિવારણ, અટકેલી યોજનાઓની સમીક્ષા અને વીજળી વ્યવસ્થાના સુધારામાં ઉપયોગી બન્યા હોવાનું મંત્રીમંડળે જણાવ્યું છે. ગુજરાતમાં ત્રણ વખત અને લોકસભાની સતત ત્રણ ચૂંટણીઓમાં મળેલા જનસમર્થનને પણ ઠરાવમાં સ્થાન અપાયું છે.
ગરીબોને આવાસ, પાણી, બેન્કિંગ અને આરોગ્ય સેવાઓ ઉપલબ્ધ કરાવવા ઉપરાંત મહિલા સશક્તીકરણ, ખેડૂતોને સહાય અને આદિવાસી સમુદાયોના વિકાસને નેતૃત્વની મુખ્ય વિશેષતાઓ ગણાવવામાં આવી છે. કરવ્યવસ્થાના સુધારા, માળખાકીય સુવિધાઓ, સ્વદેશી સંરક્ષણ ઉત્પાદન અને ટેક્નોલોજીના ઉપયોગને પણ બિરદાવવામાં આવ્યા છે.
ઠરાવમાં મહામારી દરમિયાનની કામગીરી, રાષ્ટ્રીય સુરક્ષા, આંતરરાષ્ટ્રીય સહકાર અને સાંસ્કૃતિક વારસાના જતનનો ઉલ્લેખ કરીને વર્ષ ૨૦૪૭ સુધીમાં સમૃદ્ધ, આત્મનિર્ભર અને વિકસિત ભારત બનાવવાના સંકલ્પને પુનઃવ્યક્ત કરવામાં આવ્યો છે. આ મૂલ્યાંકન મંત્રીમંડળના ઠરાવમાં વ્યક્ત કરાયેલું છે.