​નવી દિલ્હી:કેન્દ્ર સરકાર દ્વારા દેશના વેપારીઓ, હોટલ-રેસ્ટોરન્ટ સંચાલકો અને ઔદ્યોગિક એકમોને મોટી રાહત આપતો એક મહત્વપૂર્ણ નિર્ણય લેવામાં આવ્યો છે. પશ્ચિમ એશિયામાં સર્જાયેલી ભૌગોલિક-રાજકીય તણાવની સ્થિતિ હળવી થતાં અને રાષ્ટ્રીય સ્તરે એલપીજીની ઉપલબ્ધતામાં સુધારો આવતાની સાથે જ સરકારે બિન-ઘરગથ્થુ (કોમર્શિયલ) ગેસ સિલિન્ડરના સપ્લાય પરના તમામ ક્ષેત્રીય નિયંત્રણો તાત્કાલિક અસરથી હટાવી દીધા છે. આ નિર્ણયને પગલે હવે દેશભરમાં કોમર્શિયલ એલપીજીનો પુરવઠો પશ્ચિમ એશિયા કટોકટી પૂર્વેના સ્તરે સામાન્ય કરી દેવામાં આવ્યો છે.

​પેટ્રોલિયમ અને કુદરતી ગેસ મંત્રાલયના સચિવ ડૉ. નીરજ મિત્તલે આ અંગે તમામ રાજ્યો અને કેન્દ્રશાસિત પ્રદેશોના મુખ્ય સચિવોને સત્તાવાર પત્ર લખીને જાણ કરી છે. સરકારે સ્પષ્ટ કર્યું છે કે અગાઉ યુદ્ધ અને સપ્લાય ચેઈનની અનિશ્ચિતતાને કારણે સ્થાનિક રાંધણગેસ (ડોમેસ્ટિક એલપીજી) નો પુરવઠો ખોરવાય નહીં તે માટે કોમર્શિયલ સેક્ટરમાં કામચલાઉ પ્રતિબંધો અને ક્વોટા સિસ્ટમ લાગુ કરવામાં આવી હતી, જેને હવે સંપૂર્ણપણે પાછી ખેંચી લેવામાં આવી છે. નવા આદેશ અનુસાર, કોમર્શિયલ પેક્ડ એલપીજી સિલિન્ડરનો સપ્લાય અગાઉની જેમ ૧૦૦ ટકા કરી દેવાયો છે, જ્યારે બલ્ક એલપીજી સપ્લાયને પણ પ્રી-ક્રાઈસિસના પચાસ ટકા સુધી પુનઃ સ્થાપિત કરવાની મંજૂરી આપવામાં આવી છે.

​સરકારના આ મોટા નિર્ણયથી ખાસ કરીને નાના ખાદ્ય વ્યવસાયો, કેટરિંગ સર્વિસ, રોડસાઇડ સ્ટોલ્સ, મોટી હોટલો અને મેન્યુફેક્ચરિંગ યુનિટ્સને સીધો ફાયદો થશે. અગાઉ સપ્લાય મર્યાદિત હોવાને કારણે આ ક્ષેત્રોને ભારે મુશ્કેલીનો સામનો કરવો પડી રહ્યો હતો. ઓઈલ માર્કેટિંગ કંપનીઓ (OMCs) ને આદેશ આપવામાં આવ્યો છે કે તેઓ તમામ વ્યાપારી અને ઔદ્યોગિક ગ્રાહકોના ડેટાબેઝને વ્યવસ્થિત રીતે જાળવી રાખે જેથી વિતરણ વ્યવસ્થા પારદર્શક રહે.

​બીજી તરફ, સરકારે ક્લીન એનર્જી તરફ ભાર મૂકતા જણાવ્યું છે કે જે કોમર્શિયલ કે બલ્ક ગ્રાહકો ઓઈલ કટોકટી દરમિયાન પાઇપ્ડ નેચરલ ગેસ (PNG) પર શિફ્ટ થયા છે, તેઓએ લાંબા ગાળાના પગલા તરીકે પીએનજીનો જ ઉપયોગ ચાલુ રાખવો પડશે. આ ઉપરાંત, જે વિસ્તારોમાં પીએનજી નેટવર્ક ઉપલબ્ધ છે ત્યાં બાકીના વ્યવસાયિક ગ્રાહકોને પણ કાયમી ધોરણે ગેસ પાઇપલાઇન જોડાણ તરફ સ્થાનાંતરિત કરવા ઓઈલ કંપનીઓને સૂચના આપવામાં આવી છે. પશ્ચિમ એશિયાના તણાવ બાદ ભારતે સ્થાનિક રિફાઇનરીઓમાં એલપીજીનું ઉત્પાદન આશરે ૪૦ ટકા જેટલું વધારીને દૈનિક ૫૦ હજાર મેટ્રિક ટન કર્યું હતું, જેના કારણે આંતરરાષ્ટ્રીય કટોકટી વચ્ચે પણ દેશમાં ઈંધણ સુરક્ષા મજબૂત રહી છે અને હવે બજાર સંપૂર્ણપણે સામાન્ય થઈ ગયું છે.