નવી દિલ્હી, તા.22: ડિજિટલ સિક્યોરિટી અને ટ્રસ્ટ સોલ્યુશન્સ આપતી ભારતની પ્રમુખ કંપની eMudhra સાથે સંકળાયેલી સુરક્ષા ઘટનાને પગલે કેન્દ્રીય ઇલેક્ટ્રોનિક્સ અને માહિતી ટેકનોલોજી મંત્રાલય (MeitY) એ તાત્કાલિક અસરથી એક વિશેષ તપાસ ટીમની રચના કરી છે. આ સાથે જ ભારતીય કમ્પ્યુટર ઇમરજન્સી રિસ્પોન્સ ટીમ (CERT-In) દ્વારા સંભવિત ખતરાને પહોંચી વળવા માટે રક્ષણાત્મક પગલાં દર્શાવતી સત્તાવાર એડવાઇઝરી જારી કરવામાં આવી છે.

મળતી માહિતી મુજબ, ભારતીય વેબસાઇટ્સ અને ડિજિટલ સેવાઓમાં સર્જાયેલી અડચણ અત્યંત મર્યાદિત સમય માટે જ રહી હતી, અને eMudhra ની ભારત-નિયંત્રિત ડિજિટલ સિગ્નેચર સર્ટિફિકેટ (DSC) તેમજ eSign સેવાઓ સંપૂર્ણપણે અપ્રભાવિત અને સુરક્ષિત છે. જોકે, CERT-In ના અહેવાલ અનુસાર eMudhra ના પબ્લિક કી ઇન્ફ્રાસ્ટ્રક્ચરમાં આઠ મધ્યવર્તી પ્રમાણપત્ર સત્તા પ્રમાણપત્રો (જેમાં ૬ TLS અને ૨ કોડ-સાઇનિંગ પ્રમાણપત્રો સામેલ છે) ની પ્રાઇવેટ કી સાથે ચેડા થયાનું સામે આવ્યું હતું.

તકનીકી ખામીના કારણે મૂળ મજબૂત કીની સાથે નબળી ક્રિપ્ટોગ્રાફિક કી ઉત્પન્ન થઈ હતી. એક સાયબર સિક્યોરિટી રિસર્ચરે ગૂગલ, માઇક્રોસોફ્ટ, એરેગોન અને એપલ જેવી વૈશ્વિક ટેક કંપનીઓને ચેતવણી આપી હતી કે આ નબળી કીનો ઉપયોગ કરીને આર્ટિફિશિયલ ઇન્ટેલિજન્સ (AI) ટેકનોલોજી દ્વારા ડુપ્લિકેટ કી બનાવી શકાય છે, જેનાથી હેકર્સ નકલી વેબસાઇટ્સ બનાવીને સુરક્ષિત સંદેશાવ્યવહારને અટકાવી શકે છે.

આ ગંભીર નબળાઈને ધ્યાનમાં રાખીને ગૂગલે ક્રોમ બ્રાઉઝરમાં અસરગ્રસ્ત પ્રમાણપત્રોને બ્લોક કરી દીધા છે અને આગામી ૨૭ ઓક્ટોબર, ૨૦૨૬થી eMudhra ના અમુક રૂટ સ્ટોર પ્રમાણપત્રોને સંપૂર્ણ દૂર કરવાની યોજના બનાવી છે. બીજી તરફ, eMudhra એ સ્પષ્ટતા કરી છે કે તેના મુખ્ય ઇન્ફ્રાસ્ટ્રક્ચરમાં કોઈ ભંગ થયો નથી અને ગ્રાહકોના ડેટા સુરક્ષિત છે. આ સમસ્યા માત્ર તેના આંતરરાષ્ટ્રીય બિઝનેસના ૧% હિસ્સાને જ અસર કરે છે.

સરકારી અધિકારીઓએ જણાવ્યું છે કે તેઓ અન્ય સર્ટિફાઇંગ ઓથોરિટીઝમાં પણ આવી કોઈ આડઅસર છે કે કેમ તેની ઝીણવટભરી તપાસ કરી રહ્યા છે. સાથે જ તેમણે નાગરિકોને સોશિયલ મીડિયા પર ચાલતી ખોટી અફવાઓ પર ધ્યાન ન આપવા અપીલ કરી છે.

ડિજિટલ સિક્યોરિટી ક્ષેત્રે ઊભી થયેલી આ ટેકનિકલ ખામી અને ગૂગલની કાર્યવાહીના અહેવાલો બહાર આવતા જ શેરબજારમાં eMudhra ના શેરમાં ભારે કડાકો બોલી ગયો હતો, અને બુધવારે કંપનીના શેર ૨૦ ટકા તૂટીને ₹૪૩૨ ના સ્તરે ગગડી ગયા હતા. હાલમાં કંપની અસરગ્રસ્ત ગ્રાહકોના પ્રમાણપત્રો બદલવાની કામગીરી કરી રહી છે.