ઈન્દોર | તા.18: મધ્ય પ્રદેશમાં કનેક્ટિવિટીના ક્ષેત્રે એક નવો ઈતિહાસ રચાઈ રહ્યો છે. ઈન્દોર અને જબલપુર વચ્ચેના પ્રવાસને અત્યંત ઝડપી અને સરળ બનાવવા માટે મધ્ય ભારતની સૌથી લાંબી રેલવે ટનલનું બાંધકામ હવે લગભગ પૂર્ણતાના આરે છે. રેલ વિકાસ નિગમ દ્વારા અમલમાં મુકાયેલા આ મેગા પ્રોજેક્ટથી ઈન્દોરથી જબલપુર સુધીની મુસાફરીમાં મોટો ફેરફાર આવશે. આ ટનલ માત્ર એન્જિનિયરિંગનો નમૂનો નથી, પરંતુ પ્રદેશના આર્થિક વિકાસનું નવું દ્વાર પણ સાબિત થશે.
પહાડોની વચ્ચે 8.64 કિમીનો ‘મેજિકલ’ માર્ગ
ઈન્દોર-બુધની નવા રેલ પ્રોજેક્ટ હેઠળ બનાવવામાં આવી રહેલી આ ટનલની કુલ લંબાઈ 8.64 કિમી છે. આ પ્રોજેક્ટનો કુલ ખર્ચ ₹7,500 કરોડ છે, જેમાંથી માત્ર ટનલ પાછળ અંદાજે ₹1,000 કરોડ ખર્ચવામાં આવ્યા છે. હાલમાં ઈન્દોરથી જબલપુરનું અંતર 554 કિમી છે, જે આ નવી રેલ લાઇન પૂર્ણ થતાં ઘટીને માત્ર 486 કિમી રહી જશે. એટલે કે, મુસાફરોની 68 કિમીની વધારાની મુસાફરી અને એક કલાકનો કિંમતી સમય બચશે.
લેટેસ્ટ ટેકનોલોજી અને એન્જિનિયરિંગ કૌશલ્ય
દેવાસના બાગલી વિસ્તારમાં કમલાપુર પાસે આ ટનલ બનાવવામાં આવી રહી છે. કાળી માટી અને કઠણ ખડકો ધરાવતા આ વિસ્તારમાં ટનલ બનાવવી પડકારજનક હતી, તેથી ‘ન્યૂ ઓસ્ટ્રિયન ટનલિંગ મેથડ’ (NATM) જેવી અત્યાધુનિક ટેકનોલોજીનો ઉપયોગ કરવામાં આવ્યો છે. આ ટનલ બે ભાગમાં વહેંચાયેલી છે, જેમાં મુખ્ય ટનલ જમીનથી 500 મીટર જેટલી ઊંડી છે.
બ્રીજ અને નવા સ્ટેશનોનો શણગાર
205 કિમી લાંબી આ નવી રેલ લાઇન પર માત્ર ટનલ જ નહીં, પરંતુ એન્જિનિયરિંગની અન્ય અજાયબીઓ પણ જોવા મળશે. આ પ્રોજેક્ટમાં 80 મુખ્ય પુલ અને 99 નાના પુલ બનાવવામાં આવશે. આ ઉપરાંત, આ રૂટ પર 18 નવા રેલવે સ્ટેશનો બનાવવામાં આવશે, જે સ્થાનિક વિસ્તારોમાં રોજગારી અને વેપારની નવી તકો ઉભી કરશે.
વિકાસની નવી ગતિ
આ પ્રોજેક્ટ પૂર્ણ થવાથી માત્ર મુસાફરોને જ ફાયદો નહીં થાય, પરંતુ લોજિસ્ટિક્સ અને ફેક્ટરીઓ માટે માલસામાનની અવરજવર પણ ઝડપી બનશે. મધ્યપ્રદેશના હૃદય સમાન આ વિસ્તારમાં આ ટનલ વ્યાપારિક ક્રાંતિ લાવશે તેવું માનવામાં આવે છે. હવે જો કોઈ પૂછશે કે મધ્ય ભારતની સૌથી લાંબી ટનલ ક્યાં છે? તો ગર્વથી જવાબ આપી શકાશે - મધ્ય પ્રદેશમાં!