કોલંબો: તા.૦૬ તમિલનાડુ વિધાનસભા ચૂંટણીમાં ૧૦૮ બેઠકો જીતીને ઈતિહાસ રચનાર અભિનેતા અને રાજકારણી વિજયની લોકપ્રિયતા હવે માત્ર ભારત પૂરતી સીમિત રહી નથી. પડોશી દેશ શ્રીલંકાના તમિલ નેતાઓએ પણ વિજયની આ ભવ્ય જીતને વધાવી લીધી છે અને આશા વ્યક્ત કરી છે કે તેમના નેતૃત્વમાં તમિલનાડુ અને શ્રીલંકા વચ્ચેના સંબંધો વધુ ગાઢ અને સકારાત્મક બનશે.
શ્રીલંકાના નેતાઓએ આપ્યા દિલથી અભિનંદન
શ્રીલંકા પોદુજના પેરામુનાના નેતા અને સાંસદ નામલ રાજપક્ષેએ સોશિયલ મીડિયા દ્વારા વિજયને અભિનંદન પાઠવ્યા હતા. તેમણે જણાવ્યું હતું કે, "ભવ્ય વિજય બદલ વિજયને અભિનંદન! હવે અસલી કામ શરૂ થાય છે. હું ઈચ્છું છું કે તમારી ટીમ પડકારોનો સામનો કરે અને લોકોના કલ્યાણ માટે કામ કરે." રાજપક્ષેએ આશા વ્યક્ત કરી હતી કે આગામી સમયમાં બંને દેશોના લોકોના પ્રશ્નોને લઈને તમિલનાડુ સાથે વધુ સારું જોડાણ જોવા મળશે.
શ્રીલંકાની સંસદમાં પણ ગુંજ્યું વિજયનું નામ
બેટિકાલોઆ જિલ્લાના સાંસદ શનાકિયન રાસમાનિકમે શ્રીલંકાની સંસદમાં સંબોધન દરમિયાન જોસેફ વિજયને ઐતિહાસિક જીત બદલ અભિનંદન આપ્યા હતા. તેમણે કહ્યું હતું કે, "શ્રીલંકાના પ્રમુખ તમિલ રાજકીય પક્ષ તરીકે, અમે તમિલનાડુ સરકાર અને ત્યાંના લોકો સાથે મળીને કામ કરવા આતુર છીએ." શ્રીલંકાના ઉત્તર પ્રાંતમાં, જે તમિલ પ્રભુત્વ ધરાવતો વિસ્તાર છે, ત્યાં યુવાનોએ ફટાકડા ફોડીને અને વિજયના પોસ્ટરો લગાવીને આ જીતની ઉજવણી કરી હતી.
સંબંધોના નવા સમીકરણો
શ્રીલંકાના તમિલ સમુદાય માટે તમિલનાડુ હંમેશા સાંસ્કૃતિક અને રાજકીય રીતે અત્યંત મહત્વનું રહ્યું છે. વિજયની 'તમિલગા વેત્રી કઝગમ' (TVK) ની જીત બાદ શ્રીલંકાના તમિલ નેતાઓને આશા છે કે માછીમારોના પ્રશ્નો અને તમિલ સમુદાયના હિતોને લઈને નવી સરકાર વધુ સક્રિય ભૂમિકા ભજવશે. વિજયના નેતૃત્વમાં તમિલનાડુના રાજકારણમાં આવેલો આ બદલાવ દક્ષિણ એશિયાના રાજકારણ પર પણ લાંબા ગાળે અસર કરી શકે છે.