લખનૌ, તા.૦૨: ઉત્તર પ્રદેશના લાખો આઉટસોર્સ કર્મચારીઓ માટે રાજ્યના મુખ્યમંત્રી યોગી આદિત્યનાથે એક ખૂબ જ મોટો અને રાહતરૂપ નિર્ણય લીધો છે. લખનૌમાં 'ઉત્તર પ્રદેશ આઉટસોર્સિંગ સર્વિસીસ કોર્પોરેશન' (UPCOS) ના લોન્ચિંગ પ્રસંગે સીએમ યોગીએ જાહેરાત કરી હતી કે હવેથી કોઈ પણ ખાનગી આઉટસોર્સિંગ કંપની કર્મચારીઓને પોતાની મરજીથી સીધા નોકરીમાંથી કાઢી શકશે નહીં. કર્મચારીને છૂટા કરતા પહેલા સરકારની પૂર્વ પરવાનગી લેવી અનિવાર્ય રહેશે, જેથી કોઈપણ કર્મચારીનું મનસ્વી રીતે શોષણ ન થઈ શકે.

આ પ્રસંગે કર્મચારીઓ માટે અનેક કલ્યાણકારી ભેટોની જાહેરાત કરતા મુખ્યમંત્રીએ જણાવ્યું હતું કે ESI ફંડ સીધું હોસ્પિટલોને આપવામાં આવશે અને જો ત્યાં સારવાર ન મળે તો કેશલેસ સુવિધા દ્વારા પરિવારને ૫ લાખ રૂપિયા સુધીની નિઃશુલ્ક સારવાર મળશે. આ ઉપરાંત અકસ્માત કે આપત્તિની સ્થિતિમાં કર્મચારીના પરિવારને ૨૦ લાખથી ૫૦ લાખ રૂપિયા સુધીનું અકસ્માત વીમા કવચ પૂરું પાડવામાં આવશે.

શિક્ષણ, લગ્ન અને સુરક્ષા માટે વિશેષ આર્થિક સહાય

નવી સિસ્ટમ હેઠળ કર્મચારીઓના પરિવારોને મજબૂત બનાવવા માટે અનેક જોગવાઈઓ કરાઈ છે. જો કોઈ મોટી દુર્ઘટના સર્જાય તો પુત્રના શિક્ષણ માટે ૮ લાખ રૂપિયા અને પુત્રીના શિક્ષણ માટે ૧૦ લાખ રૂપિયાની સહાય આપવામાં આવશે, તેમજ પુત્રીના લગ્ન માટે પણ આર્થિક મદદ પૂરી પાડવામાં આવશે. સ્ટેટ બેંક સાથેના MOU દ્વારા શૂન્ય બેલેન્સ ખાતાની સુવિધા સાથે પરિવારના ચાર સભ્યોને વિવિધ લાભો મળશે.

પહેલી સરકારો પર પ્રહાર કરતા સીએમ યોગીએ કહ્યું કે અગાઉ આઉટસોર્સ કર્મચારીઓનું શોષણ થતું હતું અને રાજકારણીઓના સંબંધીઓની કંપનીઓ ચાલતી હતી, પરંતુ વર્તમાન સરકારે તેમને રાજ્યની સંપત્તિ ગણીને માનવીય ગૌરવ જાળવવાનું કામ કર્યું છે. UPCOS ના પોર્ટલ અને વેબસાઇટના લોન્ચિંગથી હવે સમગ્ર માનવ સંસાધન વ્યવસ્થાપન પારદર્શક અને ડિજિટલ બનશે.