બેઇજિંગ : વૈશ્વિક ટેકનોલોજી અને સેમીકન્ડક્ટર (ચિપ) માર્કેટમાં વન-મેન આર્મી ગણાતા અમેરિકા અને પશ્ચિમી દેશોના ગઢમાં ગાબડું પાડવા ચીને રાતોરાત એક અત્યંત ગુપ્ત અને અત્યાધુનિક ઓપરેશન તેજ કરી દીધું છે. સદીના સૌથી મોટા વૈજ્ઞાનિક મિશન સમાન આ પ્રોજેક્ટને નિષ્ણાતો ચીનનો 'મેનહટન પ્રોજેક્ટ' કહી રહ્યા છે. આ મિશનનો એકમાત્ર ઉદ્દેશ્ય સુપર-એડવાન્સ ચિપ્સ બનાવવા માટે અનિવાર્ય એવી 'એક્સ્ટ્રીમ અલ્ટ્રાવાયોલેટ (EUV) લિથોગ્રાફી' ટેકનોલોજીનું રહસ્ય ઉકેલવાનો છે, અને તાજેતરના અહેવાલો મુજબ ચીન આ ટેકનોલોજીનો કોડ ક્રેક કરવાની (સફળતા મેળવવાની) ખૂબ જ નજીક પહોંચી ગયું છે.
શું છે આ EUV લિથોગ્રાફી ટેકનોલોજી?
આજે આપણે જે સ્માર્ટફોન, આર્ટિફિશિયલ ઈન્ટેલિજન્સ (AI) સુપરકોમ્પ્યુટર્સ અને અત્યાધુનિક સૈન્ય હથિયારો જોઈએ છીએ, તેના મગજ સમાન 'માઇક્રોચિપ્સ' બનાવવા માટે EUV મશીનોની જરૂર પડે છે. અત્યાર સુધી આખી દુનિયામાં આ મશીનો બનાવવાનો એકહથ્થુ અધિકાર નેધરલેન્ડની (ડચ) કંપની ASML પાસે જ છે. અમેરિકાના દબાણને કારણે ASML કંપની આ મશીનો ચીનને વેચતી નથી, જેના કારણે ચીન માટે હાઈ-ટેક ચિપ્સ બનાવવાનો માર્ગ બંધ થઈ ગયો હતો. પરંતુ, હવે ચીની વૈજ્ઞાનિકોએ પોતાની દમ પર આ ટેકનોલોજી વિકસાવવાનો દાવો કર્યો છે.
ચીનનો અબજો ડોલરનો ગુપ્ત પ્રોજેક્ટ
અમેરિકી પ્રતિબંધોથી ઘેરાયેલા ચીને આ આખા મામલાને પોતાની રાષ્ટ્રીય સુરક્ષા અને પ્રતિષ્ઠાનો પ્રશ્ન બનાવી દીધો છે. હજારો ટોચના વૈજ્ઞાનિકો, એન્જિનિયરો અને અબજો ડોલરના ફંડિંગ સાથે ચીન પોતાની ધરતી પર જ આ જટિલ લિથોગ્રાફી સિસ્ટમ તૈયાર કરી રહ્યું છે. જો ચીન આ કોડ સંપૂર્ણપણે ક્રેક કરી લેશે, તો તે અમેરિકાના ટેકનોલોજીકલ પાવરને સીધો અને સૌથી મોટો ફટકો મારશે.