બિજિંગ : વૈશ્વિક બજારોમાં સોના-ચાંદીની કિંમતો ભલે સાતમા આસમાને પહોંચી હોય, પરંતુ ચીન (ડ્રેગન) ની નીતિ કંઈક અલગ જ ઈશારો કરી રહી છે. ચીન સોનાને લઈને એક અત્યંત મોટો અને ગુપ્ત ખેલ રમી રહ્યું છે, જે અંતર્ગત સોનું મોંઘું હોવા છતાં પીપલ્સ સેન્ટ્રલ બેંક ઓફ ચાઈના દ્વારા સતત સોનાની ખરીદી કરવામાં આવી રહી છે. તાજેતરના આંકડાઓ અનુસાર, ઓગસ્ટ ૨૦૨૬માં પણ ચીને પોતાના રિઝર્વમાં ૨૦ ટનથી વધુ સોનાનો મસમોટો ઉમેરો કર્યો છે. આ સાથે જ ચીન દ્વારા સતત ૨૨મા મહિને ગોલ્ડ રિઝર્વ વધારવાનો સિલસિલો યથાવત રહ્યો છે, જે છેલ્લા ત્રણ વર્ષમાં સૌથી મોટો માસિક વધારો દર્શાવે છે.

શું છે ચીનનું વિશાળ ગોલ્ડ રિઝર્વ અને આંકડાઓ?

ચાઈના ડેઈલીના અહેવાલ મુજબ, આ સતત ખરીદી બાદ ચીન પાસે કુલ સોનાનો ભંડાર વધીને હવે ૨,૩૮૭ ટન પર પહોંચી ગયો છે. માત્ર ઓગસ્ટ મહિનાની જ વાત કરીએ તો, ચીની સેન્ટ્રલ બેંકે જુલાઈના અંતની તુલનામાં ૬,૫૦,૦૦૦ ઔંસ વધુ સોનું ખરીદ્યું છે. ઓક્ટોબર ૨૦૨૩ (જ્યારે ૭,૪૦,૦০০ ઔંસ સોનું ખરીદ્યું હતું) પછી કોઈ એક મહિનામાં સોનાના ભંડારમાં થયેલો આ સૌથી મોટો ઉમેરો છે. આ આંકડાઓ સ્પષ્ટ સાબિતી આપે છે કે ચીન માત્ર સામાન્ય રોકાણ નથી કરી રહ્યું, પરંતુ ખૂબ જ યોજનાબદ્ધ રીતે સોનાનો સૌથી મોટો ભંડાર ભેગો કરી રહ્યું છે.

અમેરિકી ડૉલર સામે ડ્રેગનની સૌથી મોટી આર્થિક વ્યૂહરચના

આર્થિક નિષ્ણાતોના મતે, સતત ૨૨ મહિનાથી ચાલી રહેલી આ અંધાધૂંધ ખરીદી પાછળ ચીનનો એક મજબૂત અને લાંબા ગાળાનો ગેમ પ્લાન કામ કરી રહ્યો છે. વૈશ્વિક અર્થતંત્રમાં પોતાની પકડ મજબૂત કરવા અને અમેરિકી ડૉલર પરની પોતાની નિર્ભરતાને નહિવત્ કરવા માટે ચીન આ રમત રમી રહ્યું છે. પોતાની કરન્સી અને વિદેશી હુંડિયામણના ભંડોળને સુરક્ષિત કરવા માટે સોનાને સૌથી મોટું કવચ માનવામાં આવે છે. ચીનની આ ચાલ આવનારા સમયમાં વૈશ્વિક રાજકારણ અને આર્થિક સમીકરણોમાં મોટા પલટા લાવવા માટે સક્ષમ છે.