નવી દિલ્હી:  ઓટોમોબાઈલ જગતમાં હાલમાં ચીનની પ્રખ્યાત કાર ઉત્પાદક કંપની 'ચેરી'ની આબરૂના ધજાગરા ઉડી ગયા છે, જ્યારે મલેશિયાના રસ્તાઓ પર તેની લોકપ્રિય એસયુવી 'ચેરી ઓમોડા 5' અચાનક ચાલુ ડ્રાઇવિંગ દરમિયાન બે ભાગમાં વહેંચાઈ ગઈ હતી. સોશિયલ મીડિયા પર વાયરલ થયેલા આ હૃદયદ્રાવક વીડિયોમાં કારનું પાછળનું સસ્પેન્શન અને એક્સલ અચાનક બોડીથી અલગ થઈને રસ્તા પર પટકાયેલું જોવા મળ્યું હતું. આ ગંભીર સેફ્ટી બ્રીચ બાદ વૈશ્વિક સ્તરે કંપનીની ભારે ટીકા થઈ હતી અને મામલો એટલો વણસ્યો કે મલેશિયન સરકારે તાત્કાલિક હસ્તક્ષેપ કરીને આ મોડેલના નવા રજિસ્ટ્રેશન પર રોક લગાવી દીધી હતી, જેના પગલે કંપનીને નાછૂટકે 8,878 કાર માર્કેટમાંથી પાછી ખેંચવી પડી હતી.

આ શરમજનક સ્થિતિથી ઘેરાયેલા ચેરી ગ્રુપના ચેરમેન અને પ્રમુખ યિન ટોંગ્યુએ એક વૈશ્વિક કોન્ફરન્સમાં જાહેરમાં આ ઘટના બદલ બિનશરતી માફી માંગવી પડી હતી. તેમણે સ્વીકાર્યું હતું કે માત્ર ઝડપી નફો કમાવવાના ધ્યેયથી વિદેશી બજારોમાં ઉતરી રહેલી ચીની કંપનીઓ માટે ગુણવત્તા અને ગ્રાહકનો વિશ્વાસ સર્વોપરી હોવો જોઈએ. મલેશિયાના રોકાણ અને વેપાર મંત્રાલય સમક્ષ પણ ખેદ વ્યક્ત કરતાં તેમણે જણાવ્યું હતું કે વિદેશી ધરતી પર વેપાર કરતી વખતે સ્થાનિક કાયદાઓ અને કડક ગુણવત્તાના ધોરણોનું પાલન કરવું અનિવાર્ય છે. મલેશિયન રોડ ટ્રાન્સપોર્ટ ડિપાર્ટમેન્ટ (JPJ) દ્વારા હાલમાં આ કારના મેન્યુફેક્ચરિંગ, વેલ્ડિંગ ક્વોલિટી અને પાર્ટ્સ સપ્લાયર્સની ઊંડાણપૂર્વક ટેકનિકલ તપાસ કરવામાં આવી રહી છે.

આ સમગ્ર વિવાદ એવા સમયે સામે આવ્યો છે જ્યારે ચેરી ઓટોમોબાઈલ ભારતીય બજારમાં એન્ટ્રી કરવા માટે એડીચોટીનું જોર લગાવી રહી છે. ભારતમાં પોતાની પકડ મજબૂત કરવા માટે કંપની ભારતના દિગ્ગજ 'JSW ગ્રુપ' સાથે ભાગીદારી કરીને વર્ષ 2026 ના અંત સુધીમાં કે 2027 ની શરૂઆતમાં પોતાની કારો ભારતીય ગ્રાહકો માટે લોન્ચ કરવાની યોજના બનાવી રહી છે. અગાઉથી જ BYD જેવી ચીની ઇલેક્ટ્રિક કાર કંપનીઓ ભારતમાં સ્પર્ધા આપી રહી છે ત્યારે ચેરી માટે આ સેફ્ટી કૌભાંડ અને વૈશ્વિક બદનામી ભારતીય બજારમાં ગ્રાહકોનો ભરોસો જીતવાના તેના સપના પર મોટું ગ્રહણ લગાવી શકે છે.