નવી દિલ્હી, તા.29: જો તમે બજારમાંથી ચિપ્સ, બિસ્કિટ, નમકીન કે એરિયેટેડ સોફ્ટ ડ્રિંક્સ ખરીદીને ખાવાના શોખીન છો, તો હવે પેકેટ ખરીદતા પહેલાં તેના પરનું લેબલ જોવું ખૂબ જ જરૂરી બની જશે. દેશમાં પેકેજ્ડ ફૂડમાં સતત વધી રહેલી ખાંડ (Sugar), ફેટ (Saturated Fat) અને મીઠા (Salt/Sodium) ની માત્રા સામે દેશના નાગરિકોના સ્વાસ્થ્યનું રક્ષણ કરવા માટે ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઇન્ડિયા (FSSAI) એક મોટો અને ક્રાંતિકારી નિર્ણય લેવાની તૈયારી કરી રહી છે.

લાલ રંગનું ષટ્કોણીય ચેતવણી લેબલ લાગશે

FSSAI દ્વારા પ્રસ્તાવિત નવા નિયમ અનુસાર, હવેથી બજારમાં વેચાતી એવી તમામ પેકેટબંધ વાનગીઓ જેમાં નક્કી કરેલા સુરક્ષિત ધોરણો કરતાં ખાંડ, સોડિયમ કે ફેટનું પ્રમાણ વધારે હશે, તેના પેકેટના આગળના મુખ્ય ભાગ (Front of Pack) પર લાલ રંગનું ષટ્કોણીય ચેતવણી લેબલ (Red Hexagonal Warning Label) લગાવવું ફરજિયાત બનશે. આ લેબલ ગ્રાહકોને દૂરથી જ સ્પષ્ટ સંદેશ આપશે કે આ પ્રોડક્ટમાં હાનિકારક તત્વોનું પ્રમાણ વધુ છે, જેથી ખરીદી વખતે તેઓ પોતાના સ્વાસ્થ્ય અનુસાર સાચો નિર્ણય લઈ શકે.

કેનેડિયન મોડેલના આધારે લેવાયો નિર્ણય

વિશ્વના અનેક દેશો ખાસ કરીને કેનેડામાં પેક્ડ ફૂડના હાનિકારક તત્વો સામે ગ્રાહકોને ચેતવવા માટે આવા ફ્રન્ટ-ઓફ-પેક વોર્નિંગ લેબલ્સનો સફળતાપૂર્વક ઉપયોગ કરવામાં આવે છે. કેનેડાના આ જ મોડેલને ભારતમાં અપનાવવામાં આવી રહ્યું છે. નવા નિયમ હેઠળ પેકેટ પર 'High in Sugar' (વધુ પડતી ખાંડ) અથવા 'High in Salt/Saturated Fat' (વધુ પડતું મીઠું/ફેટ) જેવા સ્પષ્ટ શબ્દો મોટા અક્ષરે છાપવામાં આવશે. અત્યાર સુધી મોટાભાગના ગ્રાહકો પેકેટની પાછળ આપેલા ઝીણા અક્ષરોના ન્યૂટ્રિશન ચાર્ટ વાંચવાનું ટાળતા હતા, પરંતુ આ નવા ફ્રન્ટ લેબલથી હવે બાળકો અને વાલીઓ પણ પૌષ્ટિક અને બિનપૌષ્ટિક ખોરાક વચ્ચેનો તફાવત ક્ષણવારમાં સમજી શકશે.

ડાયાબિટીસ અને બીપી જેવી બીમારીઓ પર વાગશે બ્રેક

દેશમાં નાની વયે જ વધી રહેલા ડાયાબિટીસ, હાઈ બ્લડ પ્રેશર અને હૃદયરોગ જેવા ગંભીર રોગોનું મુખ્ય કારણ જંક ફૂડ અને પ્રોસેસ્ડ ફૂડમાં રહેલું વધારાનું સોડિયમ અને શુગર છે. FSSAI ના આ કડક પગલાથી માત્ર ગ્રાહકો જ નહીં, પરંતુ ખાદ્ય ઉત્પાદક કંપનીઓ પણ પોતાની પ્રોડક્ટ્સમાં ખાંડ અને મીઠાનું પ્રમાણ ઘટાડવા માટે સ્વયંભૂ મજબૂર બનશે. આ પગલાથી રોજિંદા આહારમાં પ્રિઝર્વેટિવ્સ પર અંકુશ આવશે અને દેશમાં એક સ્વસ્થ ખાણીપીણીની સંસ્કૃતિનો પ્રારંભ થશે.