મુંબઈ, તા. 13: મુંબઈની જીવાદોરી ગણાતી લોકલ ટ્રેનમાંથી આજે સવારે એક અત્યંત ચોંકાવનારી અને ડરામણી ઘટના સામે આવી છે. સવારના પીક અવર્સ દરમિયાન ટિટવાલાથી સીએસએમટી (CSMT) જઈ રહેલી એક એસી લોકલ ટ્રેનની એર કન્ડીશનીંગ સિસ્ટમ અચાનક ફેલ થઈ ગઈ હતી. ટ્રેનના દરવાજા સંપૂર્ણપણે બંધ હોવાને કારણે અને વેન્ટિલેશનના અભાવે અંદર સવાર સેંકડો મુસાફરોના શ્વાસ રુંધાવા લાગ્યા હતા. હવા ન મળવાને કારણે ભારે અફડાતફડી મચી ગઈ હતી, જેમાં ૩ મહિલા મુસાફરો બેભાન થઈ ગઈ હતી અને એકની હાલત ગંભીર હોવાથી તેને હોસ્પિટલમાં દાખલ કરવી પડી છે.
મુલુંડ સ્ટેશન પર મચી ગઈ ચીસાચીસ
આ ભયાનક ઘટના સોમવારે સવારે ૮:૩૩ વાગ્યાની આસપાસ બની હતી. ટ્રેન જ્યારે મુલુંડ રેલ્વે સ્ટેશનના પ્લેટફોર્મ નંબર ૨ પર આવીને ઊભી રહી, ત્યારે તે લગભગ ૧૦ મિનિટથી વધુ સમય સુધી એસી વગર જ પડી રહી હતી. બંધ કાચના કારણે કોચની અંદર ગરમી અને અકળામણ એટલી હદે વધી ગઈ કે મુસાફરો હાંફવા લાગ્યા હતા. કેટલીક મહિલાઓ ચક્કર ખાઈને નીચે પડી જતાં સાથી મુસાફરો અને રેલ્વે સ્ટાફ તાત્કાલિક તેમની મદદે દોડી આવ્યા હતા અને મહામુશ્કેલીએ તેમને કોચની બહાર કાઢ્યા હતા.
તમામ મુસાફરોને અધવચ્ચે ઉતારી દેવાયા
મધ્ય રેલવેના જણાવ્યા અનુસાર, ટ્રેનના એક એર કન્ડીશનીંગ યુનિટમાં અચાનક મોટી ટેકનિકલ ખામી સર્જાઈ હતી. પરિસ્થિતિ વણસતી જોઈને રેલ્વે પ્રશાસન દ્વારા તાત્કાલિક નિર્ણય લેવામાં આવ્યો અને આગળના સ્ટેશન એટલે કે કુર્લા ખાતે જ ટ્રેનના તમામ મુસાફરોને નીચે ઉતારી દેવામાં આવ્યા હતા. આ ઘટના બાદ ટ્રેનને તાત્કાલિક સેવામાંથી પાછી ખેંચી લેવામાં આવી હતી અને તેને સેન્ટ્રલ ડેપો તરફ રવાના કરાઈ હતી. રસપ્રદ વાત એ છે કે, ત્યારબાદ ટ્રેનને હવાના પ્રવાહ માટે દરવાજા ખુલ્લા રાખીને ચલાવવી પડી હતી.
રેલ્વેના દાવાઓ સામે ઉઠ્યા સવાલો
હજુ ગયા મહિનાની શરૂઆતમાં જ મધ્ય રેલવે (CR) ઝોન દ્વારા મુંબઈ ઉપનગરીય નેટવર્ક પર મુસાફરોની સુવિધા માટે ૧૨ નવી આધુનિક એસી લોકલ ટ્રેન સેવાઓ શરૂ કરવામાં આવી હતી. પરંતુ આ ઘટનાએ રેલ્વેના મેન્ટેનન્સ અને મુસાફરોની સુરક્ષાના દાવાઓ પર મોટા સવાલો ઊભા કરી દીધા છે. સોશિયલ મીડિયા પર આ ઘટનાના વિડીયો વાયરલ થતાં જ મુંબઈકરોમાં ભારે રોષ જોવા મળી રહ્યો છે.