ન્યૂયોર્ક:વિશ્વમાં 24 કલાકના ન્યૂઝ સાયકલનો પાયો નાખનાર અને કેબલ ટેલિવિઝન ઉદ્યોગના પ્રણેતા ટેડ ટર્નરનું 87 વર્ષની વયે અવસાન થયું છે. પરિવારના પ્રવક્તા ફિલિપ ઇવાન્સે પુષ્ટિ કરી છે કે, ટેડ ટર્નરે બુધવારે ફ્લોરિડાના ટેલાહસી નજીક આવેલા તેમના નિવાસસ્થાને અંતિમ શ્વાસ લીધા હતા. વર્ષ 2018 માં તેમણે પોતે જાહેરાત કરી હતી કે તેઓ 'લેવી બોડી ડિમેન્શિયા' નામની મગજની ગંભીર બીમારીથી પીડાઈ રહ્યા છે. ટેડ ટર્નર માત્ર એક મીડિયા મોગલ જ નહીં, પરંતુ પર્યાવરણવાદી, પરોપકારી અને વ્યાવસાયિક રમતગમતના શોખીન તરીકે પણ જાણીતા હતા.

સીએનએન દ્વારા ટેલિવિઝન સમાચારમાં ક્રાંતિ:

ટેડ ટર્નરની સૌથી મોટી ઓળખ અને સિદ્ધિ 'સીએનએન' (કેબલ ન્યૂઝ નેટવર્ક) ની સ્થાપના હતી. વર્ષ 1980 માં તેમણે સીએનએન શરૂ કરીને દિવસના તમામ કલાકો દરમિયાન સમાચાર પ્રસારિત કરવાની શરૂઆત કરી હતી, જેણે ટીવી ન્યૂઝની દુનિયામાં એક મોટી ક્રાંતિ લાવી અને અન્ય મીડિયા હાઉસને પણ આ માર્ગ અપનાવવા પ્રેરિત કર્યા. સીએનએનની સફળતા બાદ તેમણે સીએનએન હેડલાઇન ન્યૂઝ અને સીએનએન ઇન્ટરનેશનલ જેવી ચેનલો પણ બનાવી હતી.

એન્ટરટેઇનમેન્ટ અને સ્પોર્ટ્સ ક્ષેત્રે મોટું સામ્રાજ્ય:

મીડિયા ક્ષેત્રે તેમનો પ્રભાવ સીએનએન પૂરતો સીમિત નહોતો. તેમણે ટીબીએસ (TBS) અને ટીએનટી (TNT) જેવી લોકપ્રિય ચેનલોની સ્થાપના કરી જે આજે પણ લાખો ઘરોમાં પહોંચે છે. વર્ષ 1985 માં તેમણે 1.5 બિલિયન ડોલરમાં એમજીએમ (MGM) સ્ટુડિયોની ફિલ્મ લાઇબ્રેરી ખરીદી અને ત્યારબાદ ટર્નર ક્લાસિક મૂવીઝ (TCM) શરૂ કરી હતી. કાર્ટૂન જગતમાં પણ તેમનો મોટો ફાળો રહ્યો હતો, જેમાં તેમણે હાના-બાર્બેરા કાર્ટૂન્સની મદદથી 1992 માં કાર્ટૂન નેટવર્કની શરૂઆત કરી હતી. 1996 માં તેમણે પોતાની કંપની ટર્નર બ્રોડકાસ્ટિંગ સિસ્ટમનું ટાઈમ વોર્નર સાથે જોડાણ કરીને વિશ્વની સૌથી મોટી મીડિયા કંપનીઓ પૈકીની એક બનાવી હતી.

રમતગમત અને અન્ય સિદ્ધિઓ:

ટેડ ટર્નર રમતગમતમાં પણ ખૂબ જ સક્રિય હતા. તેઓ એટલાન્ટા બ્રેવ્સ (બેઝબોલ ટીમ) ના માલિક તરીકે પણ રહ્યા હતા અને પોતાની ચેનલો પર તેને રાષ્ટ્રીય સ્તરનું એક્સપોઝર અપાવ્યું હતું. આ ઉપરાંત, એક કુશળ નાવિક તરીકે તેમણે 1977 માં અમેરિકા કપની નૌકા સ્પર્ધામાં વિજેતા તરીકે કપ્તાની કરી હતી. તેમના નિધનથી વૈશ્વિક મીડિયા જગતમાં એક યુગનો અંત આવ્યો છે.