પટના:બિહારમાં રહેતા લોકો માટે એક મોટા સમાચાર સામે આવ્યા છે. જો તમે રસોઈ ગેસના સિલિન્ડર મેળવવામાં મુશ્કેલી અનુભવી રહ્યા હોવ, તો હવે ચિંતા કરવાની જરૂર નથી. બિહાર સરકારે રાજ્યમાં ગેસની સંભવિત અછતને પહોંચી વળવા માટે એક વૈકલ્પિક રસ્તો શોધી કાઢ્યો છે. રાજ્યના ખાદ્ય અને ગ્રાહક સુરક્ષા વિભાગે જાહેરાત કરી છે કે હવે રાજ્યની જાહેર વિતરણ વ્યવસ્થા એટલે કે રેશનની દુકાનો પર ‘કોકિંગ કોલસો’ ઉપલબ્ધ કરાવવામાં આવશે.
: સરકારના જણાવ્યા અનુસાર, પશ્ચિમ એશિયા (મિડલ ઈસ્ટ) માં ચાલી રહેલા યુદ્ધને કારણે વૈશ્વિક ઉર્જા સપ્લાય ચેઈન ખોરવાઈ ગઈ છે. આ આંતરરાષ્ટ્રીય તણાવની સીધી અસર ભારતમાં રસોઈ ગેસની આયાત અને વિતરણ પર પડી રહી છે. ગેસની અછતને કારણે સામાન્ય જનતાને ભૂખ્યા ન રહેવું પડે તે માટે વૈકલ્પિક બળતણ તરીકે કોલસો પૂરો પાડવાનો નિર્ણય લેવાયો છે. ખાસ કરીને ગ્રામીણ અને આર્થિક રીતે નબળા વર્ગો માટે આ વ્યવસ્થા આશીર્વાદરૂપ સાબિત થશે.
આ નવી વ્યવસ્થા ‘આપત્તિ વ્યવસ્થાપન અધિનિયમ, ૨૦૦૫’ હેઠળ લાગુ કરવામાં આવી રહી છે. વિભાગે આ માટે વિગતવાર માર્ગદર્શિકા તૈયાર કરી છે, જેથી NFSA (નેશનલ ફૂડ સિક્યુરિટી એક્ટ) હેઠળના લાભાર્થીઓને સરળતાથી કોલસો મળી રહે. સરકારનું માનવું છે કે કટોકટીના સમયે લોકોને પાયાની જરૂરિયાતો પૂરી પાડવી એ પ્રાથમિકતા છે.
જોકે, આ નિર્ણયની બીજી બાજુ પણ છે. નિષ્ણાતોનું માનવું છે કે ગેસની સરખામણીએ કોલસાનો ઉપયોગ સ્વાસ્થ્ય અને પર્યાવરણ માટે નુકસાનકારક હોઈ શકે છે. તેમ છતાં, ઉર્જા સંકટને જોતા સરકાર અત્યારે આને મજબૂત વિકલ્પ માની રહી છે. હવે બિહારના રસોડામાં ગેસના ચૂલાની સાથે ફરી એકવાર કોલસાની સગડીઓ જોવા મળી શકે છે.