નવી દિલ્હી: દેશભરમાં પરીક્ષાઓના પેપર લીક મામલે ચાલી રહેલું વિરોધ પ્રદર્શન હવે અત્યંત ઉગ્ર અને વ્યાપક બન્યું છે. દિલ્હીના જંતર મંતર પર કૉકરોચ જનતા પાર્ટી (CJP) ના બેનર હેઠળ હજારો વિદ્યાર્થીઓ અને યુવાનો રસ્તા પર ઉતરી આવ્યા છે. આ સમગ્ર ઘટનાક્રમ પર પોતાની પ્રથમ જાહેર ટિપ્પણી કરતા વડાપ્રધાન નરેન્દ્ર ભાઈ મોદીએ સોશિયલ મીડિયા પ્લેટફોર્મ X પર સ્પષ્ટ કર્યું હતું કે, યુવાનોના કલ્યાણ અને ભવિષ્યથી વિશેષ કંઈ નથી. દેશના યુવાનોના ભવિષ્યને નુકસાન પહોંચાડવાનો પ્રયાસ કરનારા દોષિત અને ભ્રષ્ટ અધિકારીઓને સજા આપવા માટે ફાસ્ટ ટ્રેક કોર્ટની સ્થાપના કરવામાં આવશે અને કોઈપણ દોષિતને બક્ષવામાં નહીં આવે.

ફાસ્ટ ટ્રેક કોર્ટની ઓફર ફગાવાઈ, ધર્મેન્દ્ર પ્રધાનના રાજીનામાની માંગ નોન-નેગોશિયેબલ:
વડાપ્રધાન નરેન્દ્ર ભાઈ મોદી દ્વારા કરવામાં આવેલી ફાસ્ટ ટ્રેક કોર્ટની જાહેરાતને આંદોલનકારી સંગઠન CJP એ તાત્કાલિક અસરથી ફગાવી દીધી છે. CJP ના પ્રવક્તા આશુતોષ રાંકા અને સૌરવ દાસે સ્પષ્ટ શબ્દોમાં જણાવ્યું હતું કે અસલી મુદ્દો એ છે કે વારંવાર પેપર લીક શા માટે થાય છે? CJP ના પ્રવક્તા સૌરવ દાસે કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાને 'નોન-નેગોશિયેબલ' (જેમાં કોઈ બાંધછોડ ન થઈ શકે) ગણાવ્યું હતું. આ સિવાય CJP ના સ્થાપક અભિજીત દીપકે જણાવ્યું હતું કે તેઓ સરકાર પાસે જશે નહીં, જો મંત્રીઓ વાત કરવા માગતા હોય તો તેમણે પોતે પ્રદર્શન સ્થળે આવીને જાહેર જનતા વચ્ચે વાતચીત કરવી પડશે. તેમણે ઉમેર્યું હતું કે આંદોલનની તાકાત શાંતિ અને અહિંસામાં છે.

 વિપક્ષી નેતા રાહુલ ગાંધીનો હુમલો: ૧૦ વર્ષમાં ૧૫૨ પેપર લીક, સજા શૂન્ય:
બુધવારે યોજાયેલી પ્રેસ કોન્ફરન્સમાં લોકસભામાં વિપક્ષના નેતા રાહુલ ગાંધીએ સરકાર પર આકરા પ્રહારો કર્યા હતા. રાહુલ ગાંધીએ શિક્ષણ મંત્રીના રાજીનામા ઉપરાંત વડાપ્રધાન નરેન્દ્ર ભાઈ મોદી પાસે વિદ્યાર્થીઓની માફી માંગવાની માંગ કરી હતી. તેમણે આક્ષેપ કર્યો હતો કે છેલ્લા ૧૦ વર્ષમાં દેશમાં ૧૫૨ પેપર લીકની ઘટનાઓ બની છે પરંતુ એક પણ કેસમાં દોષસિદ્ધિ (Zero Conviction) થઈ નથી. દેશની સૌથી કિંમતી સંપત્તિ એવી શિક્ષણ વ્યવસ્થાને તબાહ કરવામાં આવી રહી છે.

૧૬ મેટ્રો સ્ટેશનો બંધ: સુપ્રીમ કોર્ટમાં પહોંચી હાલાકી, સીજેઆઈ સૂર્યા કાંતનું નિવેદન:
વિદ્યાર્થીઓના આંદોલનને પગલે સુરક્ષાના કારણોસર દિલ્હી મેટ્રોના ૧૬ સ્ટેશનો બંધ કરી દેવામાં આવ્યા છે, જેમાં સુપ્રીમ કોર્ટ મેટ્રો સ્ટેશન પણ સામેલ છે. આ મામલે સુપ્રીમ કોર્ટ બાર એસોસિએશનના પ્રેસિડેન્ટ વિકાસ સિંહે મુખ્ય ન્યાયાધીશ (CJI) સૂર્યા કાંત સમક્ષ રજૂઆત કરી હતી કે વકીલો અને રજિસ્ટ્રી સ્ટાફ સમયસર કોર્ટ પહોંચી શકતા નથી. તેમણે એન્ટ્રી પાસ ધરાવતા લોકો માટે સ્ક્રિનિંગ કરીને મેટ્રો સ્ટેશન શરૂ કરવાની માંગ કરી હતી. તેના પર સીજેઆઈ સૂર્યા કાંતે જણાવ્યું હતું કે મેટ્રો સત્તાધીશો સાથે વાતચીત કરવા નિર્દેશ અપાયા છે. જો બપોરના ભોજન સુધીમાં સ્ટેશન ખોલવા અંગે કોઈ નિર્ણય નહીં આવે, તો તેઓ પોતે આ બાબતમાં હસ્તક્ષેપ કરશે. આ ઉપરાંત, વકીલોની ગેરહાજરી બદલ આજે કોઈ પ્રતિકૂળ આદેશ ન આપવા પણ નિર્દેશ અપાયા છે. દરમિયાન, દિલ્હી હાઈકોર્ટે પણ આ આંદોલન અંગેની તપાસ માંગતી જાહેર હિતની અરજી (PIL) પર સુનાવણી કરવા સંમતિ દર્શાવી છે.

સોનમ વાંગચુક અને અન્ના હજારેનું સમર્થન, દિલ્હી પોલીસની કાર્યવાહી:
આંદોલનને દેશભરમાંથી વ્યાપક સમર્થન મળી રહ્યું છે. સામાજિક કાર્યકર અન્ના હજારેએ મહારાષ્ટ્રના અહલ્યાનગરમાં મહાત્મા ગાંધીની પ્રતિમા પાસે સવારે ૧૧ થી બપોરે ૧ વાગ્યા સુધી બે કલાકનો 'મૌન સત્યાગ્રહ' કર્યો હતો. તેમણે વડાપ્રધાનને પત્ર લખીને પોલીસ કાર્યવાહી અને હિંસાની ઘટનાઓ પર દુઃખ વ્યક્ત કર્યું હતું. બીજી તરફ, સામાજિક કાર્યકર સોનમ વાંગચુકે જણાવ્યું હતું કે જો કેન્દ્ર સરકાર આંદોલનમાં ભાગ લેનાર વિદ્યાર્થીઓ સામે કોઈ દંડનીય કે બદલાલક્ષી કાર્યવાહી નહીં કરવાની સ્પષ્ટ ખાતરી આપે, તો તેઓ પોતાના અનિશ્ચિતકાલીન ભૂખ હડતાળનો અંત લાવશે.

બીજી તરફ, દિલ્હી પોલીસે જંતર મંતર પર થયેલા પ્રદર્શન અને 'ચલો સંસદ' માર્ચ દરમિયાન થયેલી હિંસા મામલે અજાણ્યા વ્યક્તિઓ સામે કુલ ૧૦ એફઆઈઆર (FIR) નોંધી છે. જેમાં સંસદ માર્ગ પોલીસ સ્ટેશનમાં ૪, કન્નોટ પ્લેસમાં ૩ અને મંદિર માર્ગ, કર્તવ્ય પથ તથા બારાખંભા રોડ પોલીસ સ્ટેશનમાં ૧-૧ એફઆઈઆર નોંધવામાં આવી છે. અત્યંત ગરમી અને ભેજવાળા વાતાવરણ વચ્ચે પણ ૧૦૦૦ થી વધુ આંદોલનકારીઓ જંતર મંતર પર ડટેલા છે, જ્યાં સામાન્ય નાગરિકો દ્વારા ભોજન અને પાણીની સહાય પહોંચાડવામાં આવી રહી છે.