​નવી દિલ્હી : ​ભારત માટે આર્થિક મોરચે એક ખૂબ જ મોટા અને ઉત્સાહવર્ધક સમાચાર સામે આવ્યા છે. દેશના સંસાધનોમાં એક નવો સુવર્ણ અધ્યાય ઉમેરાયો છે, જેનાથી ભારતની સોનાની આયાત પરની નિર્ભરતામાં મોટો ઘટાડો થવાની સંભાવના છે. આંધ્રપ્રદેશના કુર્નૂલ જિલ્લામાં લાંબા સમયની રાહ જોયા બાદ આખરે એક વિશાળ ગોલ્ડ માઇનિંગ પ્રોજેક્ટ હેઠળ કોમર્શિયલ એટલે કે વ્યાવસાયિક સ્તરે સોનાનું ઉત્પાદન સત્તાવાર રીતે શરૂ કરી દેવામાં આવ્યું છે. આ પ્રોજેક્ટ દેશના અર્થતંત્ર માટે ગેમ-ચેન્જર સાબિત થઈ શકે તેમ છે.

​મળતી સત્તાવાર માહિતી અનુસાર, આંધ્રપ્રદેશના કુર્નૂલ ખાતે સ્થાપિત આ સોનાની ખાણ પાછળ અંદાજે ₹૪૦૫ કરોડનું અધધ કહી શકાય તેવું જંગી મૂડીરોકાણ કરવામાં આવ્યું છે. આ પ્રોજેક્ટ ભારતનો સૌથી મોટો ખાનગી સોનાની ખાણનો પ્રોજેક્ટ હોવાનું માનવામાં આવી રહ્યું છે. ખાણકામની શરૂઆત સાથે જ તંત્ર અને રોકાણકારોમાં ભારે ઉત્સાહનો માહોલ જોવા મળી રહ્યો છે. ઉત્પાદનના પ્રાથમિક અંદાજો દર્શાવે છે કે આ પ્રોજેક્ટના પ્રથમ વર્ષ દરમિયાન જ ખાણમાંથી આશરે ૪૦૦ કિલોગ્રામ જેટલું શુદ્ધ સોનું બહાર કાઢવામાં આવશે, જે દેશની સ્થાનિક જરૂરિયાતોને પહોંચી વળવામાં મોટો ફાળો આપશે.

​આ પ્રોજેક્ટ માત્ર સોનાના ઉત્પાદન પૂરતો મર્યાદિત નથી, પરંતુ તે સ્થાનિક સ્તરે રોજગારીની અઢળક તકો પણ સર્જશે. અદ્યતન મશીનરી, પ્રોસેસિંગ પ્લાન્ટ્સ અને કડક સુરક્ષા માપદંડો સાથે શરૂ થયેલો આ પ્લાન્ટ આગામી સમયમાં સોનાના ઉત્પાદનની ક્ષમતામાં ક્રમશઃ વધારો કરશે. ખાણમાંથી સોનાની કાચી ધાતુ (ઓર) કાઢવાથી લઈને તેને શુદ્ધ સોનાના બિસ્કિટ કે લગડીમાં ફેરવવા સુધીની તમામ પ્રક્રિયાઓ આ અધ્યતન પ્રોજેક્ટ અંતર્ગત જ હાથ ધરવામાં આવી રહી છે. કેન્દ્ર અને રાજ્ય સરકારના વિવિધ વિભાગોની મંજૂરી બાદ શરૂ થયેલા આ પ્રોજેક્ટથી સરકારી તિજોરીને પણ ટેક્સ અને રોયલ્ટીના સ્વરૂપમાં કરોડો રૂપિયાની કમાણી થશે, જેનાથી આંધ્રપ્રદેશના સ્થાનિક વિકાસને પણ નવી ગતિ મળશે.