નવી દિલ્હી, તા.૧૭: ઓક્ટોબર મહિનાના મધ્યમાં દેશના ઉપલા ગૃહ એટલે કે રાજ્યસભાની ૧૦ બેઠકો માટે યોજાનારી ચૂંટણીઓને લઈને ઉત્તર પ્રદેશથી લઈને દિલ્હી સુધીનું રાજકારણ ગરમાયું છે. આવતા નવેમ્બર મહિનાની ૨૫મી તારીખે રાજ્યસભાના ૧૦ સાંસદોનો કાર્યકાળ પૂરો થઈ રહ્યો છે, જેમાંથી એકલા ઉત્તર પ્રદેશની ૯ અને ઉત્તરાખંડની ૧ બેઠકનો સમાવેશ થાય છે. ૨૦૨૭ની યુપી વિધાનસભા ચૂંટણી પહેલા યોજાનારી આ ચૂંટણીને રાજકીય રીતે અત્યંત મહત્વપૂર્ણ માનવામાં આવી રહી છે, કારણ કે આ ચૂંટણી રાજ્યસભામાં રાજકીય પક્ષોનું ગણિત બદલી નાખશે.

રાજ્યસભામાં નિવૃત્ત થઈ રહેલા ૧૦ સાંસદોમાં ભાજપના ૮, સમાજવાદી પાર્ટીના ૧ અને બહુજન સમાજ પાર્ટી (BSP)ના ૧ સાંસદનો સમાવેશ થાય છે. ભાજપમાંથી કેન્દ્રીય મંત્રી હરદીપ સિંહ પુરી, બી.એલ. વર્મા, નીરજ શેખર, અરુણ સિંહ, બ્રિજલાલ, સીમા દ્વિવેદી અને ચંદ્રપ્રભા નિવૃત્ત થઈ રહ્યા છે, જ્યારે સપામાંથી વરિષ્ઠ નેતા પ્રો. રામગોપાલ યાદવ અને બસપામાંથી રામજી ગૌતમનો કાર્યકાળ પૂર્ણ થઈ રહ્યો છે. યુપી વિધાનસભામાં બસપાનો એકમાત્ર ધારાસભ્ય પણ ન હોવાથી બસપા રાજ્યસભામાંથી સંપૂર્ણપણે બહાર થઈ જાય તેવી સ્થિતિ સર્જાઈ છે.

યુપીના રાજકીય ગણિત પર નજર કરીએ તો ૩૯૭ ધારાસભ્યો ધરાવતી વિધાનસભામાં રાજ્યસભાની એક સીટ જીતવા માટે ઉમેદવારને પ્રથમ પસંદગીના ઓછામાં ઓછા ૪૧ મતો (ક્વોટા)ની જરૂર પડશે. એનડીએ (NDA) પાસે ભાજપ અને સહયોગી પક્ષો મળીને ૨૯૦ જેટલું ભવ્ય બળ છે, જેના આધારે તે ૭ બેઠકો સરળતાથી જીતી શકે તેમ છે. બીજી તરફ, અખિલેશ યાદવની સમાજવાદી પાર્ટી (SP) પાસે ૧૦૧ ધારાસભ્યોનું સંખ્યાબળ હોવાથી તે ૨ બેઠકો પર વિજય મેળવી શકે છે. પરિણામે ભાજપને વર્તમાન બેઠકોમાંથી ૧ બેઠકનું નુકસાન થઈ શકે છે, જ્યારે સમાજવાદી પાર્ટીને ૧ બેઠકનો સીધો ફાયદો થવાની પૂરેપૂરી શક્યતા છે.