તિરુવનંતપુરમ : કેરળ વિધાનસભાની ૧૪૦ બેઠકોના પરિણામો જાહેર થાય તે પહેલા જ રાજકીય ગરમાવો તેની ચરમસીમાએ પહોંચ્યો છે. ૯ એપ્રિલે થયેલા ભારે મતદાન બાદ હવે સૌની નજર સોમવારની મતગણતરી પર છે. કોંગ્રેસના નેતૃત્વ હેઠળના યુનાઈટેડ ડેમોક્રેટિક ફ્રન્ટ (UDF) માં એક મોટો વ્યૂહાત્મક વળાંક જોવા મળ્યો છે. એઆઈસીસીના મહાસચિવ દીપા દાસમુન્શીએ સ્પષ્ટ કર્યું છે કે જો ગઠબંધન બહુમતી મેળવશે, તો મુખ્યમંત્રી કોણ બનશે તેનો આખરી નિર્ણય લેવાની સત્તા સાથી પક્ષોએ કોંગ્રેસ હાઈકમાન્ડને સોંપી દીધી છે. આ જાહેરાતે કોંગ્રેસ છાવણીમાં એક પ્રકારનો જોશ ભરી દીધો છે, કારણ કે અત્યાર સુધી મુખ્યમંત્રી પદ માટે ગઠબંધનમાં ખેંચતાણની અટકળો લગાવાતી હતી.

ચૂંટણીના આ જંગમાં કુલ ૮૮૩ ઉમેદવારોનું ભાવિ ઇલેક્ટ્રોનિક વોટિંગ મશીન (EVM) માં કેદ છે. વહીવટીતંત્રે મતગણતરી માટે ૪૩ સ્થળોએ ૧૪૦ કેન્દ્રો પર લોખંડી બંદોબસ્ત ગોઠવ્યો છે. ૧૫,૦૦૦ થી વધુ કર્મચારીઓ આ પ્રક્રિયામાં જોડાયા છે ત્યારે કોંગ્રેસે તિરુવનંતપુરમમાં પોતાના મુખ્યાલય 'ઈન્દિરા ભવન' ખાતે જંગી વિજયની ઉજવણી માટે તૈયારીઓ શરૂ કરી દીધી છે. કાર્યકરો માટે ખાસ મંડપો અને રોકાવાની વ્યવસ્થા કરવામાં આવી રહી છે, જે દર્શાવે છે કે એક્ઝિટ પોલ કે અન્ય અંદાજો વચ્ચે કોંગ્રેસ પોતાની જીત માટે કેટલી મક્કમ છે. જોકે, હાઈકમાન્ડની સ્થાપિત પ્રક્રિયા મુજબ ધારાસભ્યોના પરામર્શ બાદ જ અંતિમ મહોર મારવામાં આવશે.

કેરળમાં સત્તા પરિવર્તનના આ પવન વચ્ચે મુખ્યમંત્રી પદ માટે અનેક દિગ્ગજોના નામ હવામાં તરી રહ્યા છે. વી.ડી. સતીસન અને રમેશ ચેન્નીથલા જેવા પ્રાદેશિક નેતાઓ ઉપરાંત કે.સી. વેણુગોપાલનું નામ પણ રેસમાં હોવાની સોશિયલ મીડિયા પર ભારે ચર્ચા છે. જોકે પક્ષે હાલમાં આવી ચર્ચાઓને કાર્યકરોનો ઉત્સાહ ગણાવીને ફગાવી દીધી છે. કોંગ્રેસ માટે આ ચૂંટણી પ્રતિષ્ઠાનો જંગ છે, કારણ કે દક્ષિણ ભારતમાં પોતાની પકડ મજબૂત રાખવા માટે કેરળ પર કબજો મેળવવો અત્યંત અનિવાર્ય છે. હવે જોવાનું એ રહેશે કે સોમવારની સવારે જ્યારે ઇવીએમ ખુલશે ત્યારે કેરળની જનતા 'ઈન્દિરા ભવન' માં ફટાકડા ફોડવાની તક આપે છે કે નહીં.