બોસ્ટન : અમેરિકાના મેસેચ્યુસેટ્સમાં ચર્ચાસ્પદ બનેલા લિન્ડસે ક્લેન્સી હત્યા કેસની આસપાસ સોશિયલ મીડિયા પર એક અત્યંત શરમજનક અને ખલેલ પહોંચાડનાર ટ્રેન્ડ સામે આવ્યો છે, જેના કારણે ઓનલાઈન જગતમાં ભારે આક્રોશ ફેલાયો છે. TikTok પર કેટલીક મહિલાઓ દ્વારા બાળકોને નુકસાન પહોંચાડવાના ગંભીર કૃત્યોનો ડોળ કરતી રીલ્સ બનાવવામાં આવી રહી છે, જેમાં બાળકને સીડી પરથી ફેંકી દેવા કે વોશિંગ મશીનમાં મૂકવાના અભિનય કરતી નજરે પડે છે. આ પ્રકારની સંવેદનશીલ અને પીડાદાયક ઘટનાઓને મનોરંજન કે વ્યુઝ મેળવવાનું સાધન બનાવવા સામે નેટીઝન્સે લાલઘૂમ થઈને આકરી પ્રતિક્રિયા આપી છે.

આ વિવાદ જાન્યુઆરી ૨૦૨૩ ની ઘટના સાથે જોડાયેલો છે, જેમાં ભૂતપૂર્વ નર્સ લિન્ડસે ક્લેન્સી પર તેના પોતાના ત્રણ માસૂમ બાળકોની હત્યા કરવાનો આરોપ છે. બચાવ પક્ષ દાવો કરી રહ્યો છે કે હત્યા સમયે તે પોસ્ટપાર્ટમ સાયકોસિસ જેવી ગંભીર માનસિક બીમારીનો શિકાર હતી, જ્યારે ફોર્મલ ટ્રાયલ અને જ્યુરીની ચર્ચાઓ હજુ પણ વણઉકેલાયેલી છે. આ સંવેદનશીલ મુદ્દા પર સોશિયલ મીડિયા બે ભાગમાં વહેંચાયેલું છે. એક તરફ જ્યાં કેટલાક લોકો માનસિક સ્વાસ્થ્યના સંઘર્ષોને સમર્થન આપી રહ્યા છે, તો બીજી તરફ આવા વાયરલ ટ્રેન્ડ્સ માતૃત્વ અને બાળ સુરક્ષા જેવા ગંભીર વિષયની મ્હાલાત ઉડાવતા હોવાથી લોકોમાં તીવ્ર નારાજગી જોવા મળી રહી છે.