વોશિંગ્ટન, તા. ૨૭: અમેરિકાના રાજકારણમાં અત્યારે 'કાશ પટેલ' નામ સૌથી વધુ ચર્ચામાં છે. પ્રમુખ ડોનાલ્ડ ટ્રમ્પના નજીકના અને FBI ડાયરેક્ટર કાશ પટેલ પર હવે તેમની જ પાર્ટીના એક નેતાએ વંશીય રંગ ધરાવતી ટિપ્પણી કરતા મોટો વિવાદ ઊભો થયો છે. ફ્લોરિડાના ગવર્નર પદની રેસમાં ઉતરેલા રિપબ્લિકન ઉમેદવાર જેમ્સ ફિશબેકે એક જાહેર કાર્યક્રમમાં કાશ પટેલની કાર્યક્ષમતાની મજાક ઉડાવતા 'ઇન્ડિયન ફૂડ'નો ઉલ્લેખ કર્યો હતો, જેનો વીડિયો અત્યારે સોશિયલ મીડિયા પર વાયરલ થઈ રહ્યો છે.
શું હતી તે વિવાદાસ્પદ ટિપ્પણી?
એક ચૂંટણી સભામાં સ્ટેન્ડ-અપ કોમેડી સ્ટાઇલમાં ભાષણ આપતા ફિશબેકે કહ્યું હતું કે, "ગઈકાલે રાત્રે મારા 'ડોરડેશ' (ફૂડ ડિલિવરી એપ) ઓર્ડર સાથે શું થયું તેની તપાસ કરવા માટે પણ હું કાશ પટેલ પર વિશ્વાસ ન કરું. અને તેના પ્રત્યે ન્યાયી રહેવા માટે કહું તો, એ 'ઇન્ડિયન ફૂડ' હતું." ફિશબેકના આ નિવેદન પર ત્યાં હાજર લોકોએ હાસ્ય અને ઉત્સાહ વ્યક્ત કર્યો હતો, પરંતુ ઓનલાઇન પ્લેટફોર્મ પર આ ટિપ્પણીને ભારતીય મૂળના લોકોનું અપમાન ગણાવવામાં આવી રહી છે.
કાશ પટેલ પર વધી રહેલું દબાણ
આ ટિપ્પણી એવા સમયે આવી છે જ્યારે કાશ પટેલ પહેલેથી જ વિવાદોમાં ઘેરાયેલા છે. 'ધ એટલાન્ટિક' મેગેઝિનના એક રિપોર્ટમાં પટેલ પર દારૂ પીવા અને મહત્વની મીટિંગો ચૂકી જવાના ગંભીર આક્ષેપો કરવામાં આવ્યા હતા. જોકે, કાશ પટેલે આ તમામ આરોપોને નકારી કાઢ્યા છે અને મેગેઝિન સામે ૨૫૦ મિલિયન ડોલરનો માનહાનિનો દાવો કરવાની જાહેરાત કરી છે.
કોણ છે જેમ્સ ફિશબેક?
માત્ર ૨૯ વર્ષના જેમ્સ ફિશબેક એક હેજ ફંડ મેનેજર છે અને પ્રથમ વખત રાજકારણમાં નસીબ અજમાવી રહ્યા છે. તેઓ 'એઝોરિયા પાર્ટનર્સ' ના CEO છે. તેમનો આ અંદાજ ઘણા રાજકીય વિશ્લેષકોને અજીબ લાગી રહ્યો છે, કારણ કે તેઓ ગવર્નર જેવી ગંભીર પોસ્ટ માટે ચૂંટણી લડી રહ્યા હોવા છતાં સ્ટેન્ડ-અપ કોમેડિયન જેવું વર્તન કરી રહ્યા છે.
રાજકીય ગરમાવો
ટ્રમ્પ પ્રશાસનમાં મહત્વના હોદ્દા પર રહેલા કાશ પટેલ પર તેમની જ પાર્ટીના નેતા દ્વારા કરવામાં આવેલી આ કટાક્ષભરી ટિપ્પણીથી રિપબ્લિકન પાર્ટીમાં આંતરિક ખેંચતાણ સ્પષ્ટ દેખાઈ રહી છે. એક તરફ કાશ પટેલ FBI ને સંપૂર્ણપણે બદલી નાખવાની તૈયારી કરી રહ્યા છે, ત્યારે બીજી તરફ તેમની ક્ષમતા અને મૂળ વિશે કરવામાં આવતી આવી ટિપ્પણીઓ આગામી સમયમાં નવો વળાંક લાવી શકે છે.