હૈદરાબાદ : તેલુગુ અભિનેતા અને આંધ્રપ્રદેશના નાયબ મુખ્યમંત્રી પવન કલ્યાણના અંગત જીવનને લઈને ચાલી રહેલી ચર્ચાઓ વચ્ચે તેમની પૂર્વ પત્ની રેણુ દેસાઈએ દિવાળી પર ફટાકડા ફોડવા અંગે વ્યક્ત કરેલી ચિંતાઓને લઈને તેમને ટ્રોલ કરનારાઓને આડે હાથ લીધા છે.

પ્રાપ્ત વિગતો અનુસાર, રેણુ દેસાઈએ સોશિયલ મીડિયા પર તીખી પ્રતિક્રિયા આપતા કેટલાક યુટ્યુબર્સ અને પ્રેસ દ્વારા તેમના નિવેદનને સનસનાટીભરી બનાવીને વ્યુઝ મેળવવાના પ્રયાસોની આકરી ટીકા કરી છે અને કહ્યું છે કે લોકોના દુઃખમાંથી પૈસા કમાનારાઓ પર કર્મનો માર પડે છે.

રેણુએ સ્પષ્ટતા કરી હતી કે તેઓ ન તો હિન્દુ વિરોધી છે અને ન તો સનાતન પરંપરાઓનો વિરોધ કરી રહી છે, પરંતુ તેમનો હેતુ માત્ર તહેવારોની ઉજવણી દરમિયાન અન્ય જીવો અને આસપાસના લોકોની મુશ્કેલીઓ પ્રત્યે સંવેદનશીલ બનવાનો હતો.

તેમણે સોશિયલ મીડિયા વપરાશકર્તાઓને અપીલ કરી હતી કે તેમની આ ટિપ્પણીઓને પવન કલ્યાણના અંગત જીવનમાં બનેલી ઘટનાઓ સાથે જોડીને મૂર્ખામીભરી અટકળો ન ફેલાવવી જોઈએ કારણ કે દરેક વ્યક્તિને અંગત જીવનમાં મુશ્કેલીઓ હોઈ શકે છે.

અભિનેત્રીએ પોતાના નિવેદનમાં ઉમેર્યું હતું કે સમાજે એકબીજા પ્રત્યે દયાળુ બનવું જોઈએ અને કાચના ઘરમાં રહેનારાઓએ બીજા પર પથ્થર ફેંકવાને બદલે સંવેદના દાખવવી જોઈએ, તેમજ મુશ્કેલ સમયમાં કોઈપણ વ્યક્તિને દોષી ઠેરવવો નૈતિક રીતે યોગ્ય નથી.

આ સમગ્ર પ્રકરણ બાદ સોશિયલ મીડિયા પર સેલિબ્રિટીઝના અંગત જીવન અને તેમના નિવેદનો પર થતી બિનજરૂરી ચર્ચાઓ અંગે ફરી એકવાર નૈતિકતા અને જવાબદારીનો મુદ્દોે વ્યાપક સ્તરે ચર્ચાના કેન્દ્રમાં આવ્યો છે.