મેરઠ : અયોધ્યાના ભવ્ય રામ મંદિરમાં પ્રસાદની ચોરીના મામલાએ હવે દેશભરમાં મોટું રાજકીય અને ધાર્મિક સ્વરૂપ ધારણ કરી લીધું છે. ઉત્તર પ્રદેશ સરકાર દ્વારા આ મામલે સ્પેશિયલ ઇન્વેસ્ટિગેશન ટીમ (SIT) ની રચના કરીને તપાસ તેજ કરવામાં આવી છે, ત્યારે જ્યોતિષ પીઠના શંકરાચાર્ય સ્વામી અવિમુક્તેશ્વરાનંદ મહારાજે આ સમગ્ર ઘટના પર ઘેરી ચિંતા વ્યક્ત કરી છે. તેમણે રામ મંદિર ટ્રસ્ટની કામગીરી, પારદર્શિતા અને વિશ્વસનીયતા પર ગંભીર સવાલો ઉઠાવતા માંગ કરી છે કે, આ ભ્રષ્ટાચારની નિષ્પક્ષ તપાસ માટે દેશના વરિષ્ઠ અને નિષ્પક્ષ સંતોની એક વિશેષ સમિતિ બનાવવામાં આવે.

"બાળકના પગ પારણામાં જ દેખાય..." શંકરાચાર્યનો ટ્રસ્ટ પર વાર

પ્રસિદ્ધ કહેવતનો ઉલ્લેખ કરતા શંકરાચાર્યએ મીડિયા સમક્ષ આકરા શબ્દોમાં જણાવ્યું કે, શરૂઆતથી જ જે પ્રકારની અનિયમિતતાઓ અને ચોરીની ઘટનાઓ સામે આવી રહી છે, તે ભવિષ્યની કાર્યપ્રણાલી પર મોટો શંકાનો દાયરો ઊભો કરે છે. તેમણે સ્પષ્ટ કર્યું કે મંદિરોના દાન અને વ્યવસ્થાપનની સંપૂર્ણ દેખરેખ માત્ર પવિત્ર સંતોના હસ્તે જ થવી જોઈએ, તો જ તેમાં શુદ્ધતા અને પારદર્શિતા જળવાઈ રહેશે. આ ઉપરાંત, તેમણે દેશમાં હિન્દુ બાળકોના વધી રહેલા ધર્માંતરણ (ધર્મ પરિવર્તન) ના કિસ્સાઓ પર પણ ચિંતા વ્યક્ત કરી હતી.

ગાયનું દૂધ નહીં પીઓ અને ગૌસેવા નહીં કરો, તો સંસ્કારોનું પતન નક્કી છે!

ધર્માંતરણની સમસ્યા પાછળ ગાય માતા પ્રત્યે ઘટી રહેલી શ્રદ્ધાને જવાબદાર ઠેરવતા શંકરાચાર્યએ એક અનોખો તર્ક રજૂ કર્યો હતો. તેમણે જણાવ્યું કે, "આજની પેઢી અવારનવાર પૂછે છે કે શું તમે માતાનું દૂધ પીધું છે? પરંતુ તેઓ ભૂલી જાય છે કે ગાય પણ આપણી સનાતન માતા છે." ભારતીય સંસ્કૃતિમાં સંસ્કારોનો સીધો સંબંધ ગૌસેવા અને ગાયના શુદ્ધ દૂધ સાથે છે. ગૌમાતાથી દૂરી બનાવવાને કારણે જ યુવા પેઢી ગેરમાર્ગે દોરાઈ રહી છે અને ધર્માંતરણનો શિકાર બની રહી છે.

"જો મુખ્યમંત્રી ગાયને ખરેખર માતા માનતા હોય, તો માત્ર વાતો કરવાને બદલે તેને 'રાષ્ટ્રમાતા' નો સત્તાવાર દરજ્જો કેમ આપતા નથી?"

— શંકરાચાર્ય સ્વામી અવિમુક્તેશ્વરાનંદ સરસ્વતી

૮૧ દિવસની 'ગૌવિષ્ઠી યાત્રા' નું ભવ્ય સ્વાગત

જગદગુરુ શંકરાચાર્યના નેતૃત્વમાં નીકળેલી ૮૧ દિવસની 'ગૌવિષ્ઠી યાત્રા' (ગાય સંરક્ષણ અને સંતાન વૃદ્ધિ અભિયાન) નું બાગપતના પક્કાઘાટ આશ્રમ ખાતે શ્રદ્ધાળુઓ દ્વારા ભવ્ય સ્વાગત કરવામાં આવ્યું હતું. આ પ્રસંગે ભાવિકોને સંબોધતા તેમણે ઉમેર્યું કે, ગાય માત્ર ધાર્મિક શ્રદ્ધાનો વિષય નથી, પરંતુ તે ભારતીય ગ્રામીણ અર્થતંત્ર અને સનાતન પરંપરાનો મુખ્ય આધારસ્તંભ છે. માનવ કલ્યાણ માટે સમાજના દરેક વર્ગે ગૌરક્ષા અને ધર્મરક્ષા કાજે એક થઈને આગળ આવવું પડશે.