નવી દિલ્હી: NEET-UG 2026 પેપર લીક પ્રકરણમાં શિક્ષણ મંત્રીના રાજીનામાની માંગ સાથે અનિશ્ચિત ભૂખ હડતાળ પર બેઠેલા જાણીતા કાર્યકર્તા સોનમ વાંગચુકને ૧૮ જુલાઈએ દિલ્હી પોલીસે જંતર-મંતરથી બળજબરીપૂર્વક હટાવીને સફદરજંગ હોસ્પિટલમાં ખસેડતા રાજકીય અને સામાજિક મોરચે ભારે વિવાદ સર્જાયો છે. આ કાર્યવાહીના વિરોધમાં હવે જાણીતી અભિનેત્રી દિયા મિર્ઝા મેદાને ઉતરી છે અને તેમણે શાંતિપૂર્ણ વિરોધ કરવાના બંધારણીય અધિકારનું સમર્થન કરતા સરકારની ટીકા કરી છે.
ઘટનાક્રમ મુજબ, ૨૮ જૂનથી સોનમ વાંગચુક શિક્ષણ પ્રણાલીમાં પારદર્શિતા અને જવાબદારીની માંગ સાથે ભૂખ હડતાળ કરી રહ્યા હતા. જોકે, ૧૮ જુલાઈના રોજ પોલીસે હાઈકોર્ટના આદેશોનો હવાલો આપીને તેમને વિરોધ સ્થળ પરથી હટાવ્યા હતા. પોલીસે દાવો કર્યો હતો કે તેમની બગડતી તબિયતને ધ્યાનમાં રાખીને તબીબી સંભાળ માટે તેમને હોસ્પિટલ ખસેડવા અનિવાર્ય હતા, પરંતુ કાર્યકર્તાના સમર્થકોએ આને ગેરકાયદેસર અટકાયત ગણાવી છે.
સોશિયલ મીડિયા પર પોતાની પ્રતિક્રિયા આપતા દિયા મિર્ઝાએ જણાવ્યું હતું કે, "હું આ દેશના વિદ્યાર્થીઓ સાથે ઉભી છું અને શાંતિપૂર્ણ રીતે વિરોધ કરવાના સોનમ વાંગચુકના અધિકારને પૂરેપૂરું સમર્થન આપું છું." તેમણે નેલ્સન મંડેલા અને ગાંધીજીના વિચારોને યાદ કરતા કહ્યું કે, લોકશાહીમાં અસંમતિ અને વિરોધ એ પરિવર્તનનું માધ્યમ છે, તેને દબાવવા જોઈએ નહીં. મિર્ઝાએ સ્પષ્ટપણે જવાબદારી અને શિક્ષણ સુધારાની માંગણીમાં વાંગચુક સાથે એકતા દર્શાવી છે.
પોલીસ કાર્યવાહી અંગે ડીસીપીએ X પર સ્પષ્ટતા કરી હતી કે, માનનીય હાઈકોર્ટના આદેશોનું પાલન કરવામાં આવ્યું છે. નિવેદનમાં જણાવાયું હતું કે, "વિરોધ સ્થળ પર હંગામો થયો હતો, છતાં પોલીસે મહત્તમ સંયમ દાખવ્યો હતો." બીજી તરફ, સોનમ વાંગચુકની પત્ની ડૉ. ગીતાંજલિ આંગ્મોએ દિલ્હી હાઈકોર્ટમાં અરજી દાખલ કરીને આ સમગ્ર કાર્યવાહીને તબીબી સારવારના નામે ગેરકાયદેસર અટકાયત ગણાવી છે.
હાલમાં વાંગચુક સફદરજંગ હોસ્પિટલમાં તબીબી દેખરેખ હેઠળ છે, જ્યારે આ મુદ્દો દેશભરમાં શિક્ષણ વ્યવસ્થાની ખામીઓ અને વિદ્યાર્થીઓના આંદોલનને લઈને ચર્ચાનું કેન્દ્ર બન્યો છે. હવે આગામી દિવસોમાં હાઈકોર્ટમાં થનારી સુનાવણી અને સરકાર આ મુદ્દે શું વલણ અપનાવે છે તેના પર સૌની નજર ટકેલી છે. વિદ્યાર્થી સંગઠનોએ આ આંદોલનને વધુ વેગ આપવાની ચીમકી ઉચ્ચારી છે.