કન્નુર : કેરલના રાજકીય હિંસા માટે જાણીતા કન્નુર જિલ્લામાંથી એક મોટો ચુકાદો સામે આવ્યો છે. વર્ષ 2011માં આરએસએસ અને ભાજપના કાર્યકરો પર થયેલા ભયાનક બોમ્બ હુમલાના કેસમાં કોર્ટે 10 લોકોને દોષિત ઠેરવીને આકરી જેલની સજા ફટકારી છે. આ ચુકાદાથી રાજકીય વેરઝેર રાખીને હિંસા આચરનારા તત્વોમાં ફફડાટ વ્યાપી ગયો છે.
મુખ્ય આરોપીને 25 વર્ષની સખત કેદ
તાલિપરમ્બાની એડિશનલ ડિસ્ટ્રિક્ટ એન્ડ સેશન્સ કોર્ટે આ મામલે ચુકાદો આપતા મુખ્ય આરોપી ટી.વી. બિનુ ઉર્ફે ઉરુમ્બન બિનુને 25 વર્ષની સખત જેલની સજા સંભળાવી છે. સરકારી વકીલના જણાવ્યા અનુસાર, બિનુએ જ કાર્યકરોથી ભરેલી ગાડી પર સીધો બોમ્બ ફેંક્યો હતો. આ સિવાય અન્ય 9 આરોપીઓને પણ વિવિધ કલમો હેઠળ 10 વર્ષ સુધીની કેદ અને તમામ દોષિતોને મળીને કુલ ₹2.6 લાખનો દંડ ફટકારવામાં આવ્યો છે.
શાખા ખોલવા બાબતે શરૂ થયો હતો વિવાદ
આ ઘટનાની પૃષ્ઠભૂમિ તપાસતા માલૂમ પડે છે કે, 27 નવેમ્બર 2011ના રોજ થિમિરી કોલેજ નજીક આ હુમલો થયો હતો. હકીકતમાં, આ વિસ્તારમાં આરએસએસની શાખા ખોલવા બાબતે સીપીએમ અને આરએસએસના જૂથો વચ્ચે ઉગ્ર દલીલો થઈ હતી. હુમલાના એક દિવસ પહેલા પણ બંને પક્ષો વચ્ચે અથડામણ થઈ હતી, જેના વેરના વળતા પાણી રૂપે બીજા દિવસે આ લોહિયાળ હુમલો કરવામાં આવ્યો હતો.
30 લોકોના જીવ જોખમમાં મુકાયા હતા
જ્યારે આ બોમ્બ હુમલો થયો ત્યારે વાહનમાં અંદાજે 30 જેટલા કાર્યકરો સવાર હતા. એકાએક થયેલા વિસ્ફોટને કારણે વાહનમાં સવાર લોકોમાં નાસભાગ મચી ગઈ હતી, જેમાં 9 કાર્યકરોને ગંભીર ઈજાઓ પહોંચી હતી. આટલા વર્ષો સુધી ચાલેલી કાનૂની લડત બાદ આજે પીડિતોને ન્યાય મળ્યો છે.
કોર્ટે પોતાના ચુકાદામાં નોંધ્યું હતું કે લોકશાહીમાં હિંસાનું કોઈ સ્થાન નથી. અન્ય આરોપીઓમાં એમ.કે. પ્રદીપકુમાર, પી.પી. સત્યાન, અને પી.વી. બાબુરાજ સહિતના સભ્યોનો સમાવેશ થાય છે. આ ચુકાદાને પગલે કેરલના રાજકારણમાં અને ખાસ કરીને કન્નુર પટ્ટામાં સુરક્ષા વ્યવસ્થા સઘન કરી દેવામાં આવી છે.