નવી દિલ્હી: રાજ્યસભામાં તાજેતરમાં જાહેર પરીક્ષાઓ (અયોગ્ય ઉપાયો નિવારણ) સુધારા બિલ, 2026 પર ચર્ચા ચાલી રહી હતી, ત્યારે અચાનક જ ગૌમૂત્રનો મુદ્દો રાષ્ટ્રીય રાજકારણના કેન્દ્રમાં આવી ગયો. ભાજપના સાંસદ સુધાંશુ ત્રિવેદીએ સંસદ ભવનમાં કોંગ્રેસ પર હિન્દુ ધર્મ અને ભારતીય સંસ્કૃતિનું અપમાન કરવાનો ગંભીર આરોપ લગાવ્યો, જેણે દેશભરમાં એક નવી રાજકીય ચર્ચાને વેગ આપ્યો છે.

ચર્ચા દરમિયાન ભાજપના સાંસદ સુધાંશુ ત્રિવેદીએ આક્રમક રૂખ અપનાવતા જણાવ્યું કે વિપક્ષી નેતાઓ દ્વારા પેપર લીક અને NEET જેવા અત્યંત સંવેદનશીલ અને ગંભીર રાષ્ટ્રીય મુદ્દાઓ પર ચર્ચા કરવાને બદલે બિનજરૂરી રીતે ગૌમૂત્રનો વિષય ઉછાળવામાં આવ્યો છે. તેમણે આક્ષેપ કર્યો કે વિપક્ષને જ્યારે પણ મોકો મળે છે ત્યારે તે આપણી સનાતન સંસ્કૃતિ અને પરંપરાઓ પર કટાક્ષ કરવાનો કોઈ મોકો છોડતો નથી.

પોતાના દાવાને મજબૂત કરવા માટે ભાજપના નેતાએ વૈજ્ઞાનિક તથ્રોનો સહારો લીધો હતો. સુધાંશુ ત્રિવેદીએ દાવો કર્યો કે ગૌમૂત્રના ঔষધીય ગુણધર્મો અને તેના ઉપયોગો માટે અમેરિકામાં સત્તાવાર રીતે આંતરરાષ્ટ્રીય પેટન્ટ નોંધાયેલા છે. તેમણે વિશેષરૂપે યુએસ પેટન્ટ 6410059 અને યુએસ પેટન્ટ 6896907 નો ઉલ્લેખ કરીને જણાવ્યું કે આ પેટન્ટ્સમાં ગૌમૂત્ર નિસ્યંદનના ફાર્માસ્યુટિકલ ઉપયોગો વર્ણવવામાં આવ્યા છે.

આંતરરાષ્ટ્રીય સ્તરે સ્વીકૃત વૈજ્ઞાનિક સંશોધનોનો હવાલો આપતા ત્રિવેદીએ ઉમેર્યું કે ગૌમૂત્ર એન્ટિબાયોટિક્સ, એન્ટિફંગલ અને કેન્સર વિરોધી દવાઓની અસરકારકતા તેમજ શરીર દ્વારા તેના શોષણને અદભુત રીતે વધારે છે. વિજ્ઞાનની ભાષામાં તેને એક શક્તિશાળી "બાયો-એન્હેન્સર" તરીકે ગણવામાં આવે છે, અને આજના યુગના વિદ્યાર્થીઓએ પૂર્વગ્રહ છોડીને તથ્યોના આધારે આ વિષયને સમજવો અનિવાર્ય છે.

આ સમગ્ર વિવાદની પૃષ્ઠભૂમિ તપાસીએ તો, તાજેતરમાં કોંગ્રેસ નેતા પ્રિયંકા ગાંધી વાડ્રા દ્વારા આઈઆઈટી મદ્રાસના ડિરેક્ટર વી. કામકોટીને ગૌમૂત્ર નિષ્ણાત તરીકે સંબોધવામાં આવ્યા બાદ આ રાજકીય ઘમાસાણની શરૂઆત થઈ હતી. વિપક્ષી નેતાઓની આ પ્રકારની ટિપ્પણીઓ સામે સત્તાપક્ષના નેતાઓ હવે આક્રમક રીતે વૈજ્ઞાનિક અને આંતરરાષ્ટ્રીય દસ્તાવેજોના આધારે પલટવાર કરી રહ્યા છે.

આ ઘટનાક્રમ બાદ સંસદથી લઈને સોશિયલ મીડિયા સુધી ભારતીય પરંપરાઓ અને આધુનિક વિજ્ઞાનના સમન્વય અંગેની ચર્ચાઓ જોરશોરથી શરૂ થઈ ગઈ છે. આગામી દિવસોમાં આ મુદ્દો સંસદીય કાર્યવાહી તેમજ રાજકીય મંચો પર વધુ ગરમાવો લાવે તેવી પૂરી સંભાવના દેખાઈ રહી છે.