તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
રેલવેમાં ગુનાખોરીઃ સામાનની ચોરી અને મહિલાઓ વિરુદ્ધના ગુનાઓમાં મહારાષ્ટ્ર મોખરે
રાજ્યમાં સમાન ચોરી, ખંડણી અને લૂંટના ૨૦,૫૧૯ કેસ નોંધાયા : હરિયાણામાં હત્યા અને આત્મહત્યા માટે ઉશ્કેરણીના ગુનાઓની સંખ્યા વધુઃ છેતરપિડીમાં આસામ મહારાષ્ટ્ર કરતા આગળ
મુંબઈ,તા.૨૮: નેશનલ ક્રાઈમ રેકોર્ડ્સ બ્યુરોના એક અહેવાલ મુજબ, ટ્રેન મુસાફરી દરમિયાન થતા ગુનાઓમાં મહારાષ્ટ્ર દેશમાં પ્રથમ ક્રમે છે. રાજ્યમાં સમાન ચોરી, ખંડણી અને લૂંટના ૨૦,૫૧૯ કેસ નોંધાયા છે. મુંબઈની ઉપનગરીય લોકલ અને મેલ-એક્સપ્રેસ ટ્રેનોમાં ભીડ ગુનેગારો માટે અનુકૂળ સ્થળ સાબિત થઈ રહી છે.
ઉપનગરીય રેલ્વે અને લાંબા અંતરની મેઇલ-એક્સપ્રેસ ટ્રેનોમાં આચરવામાં આવતા વિવિધ ગુનાઓની ફરિયાદ રેલ્વે પોલીસમાં નોંધવામાં આવે છે. દેશભરમાં જીઆરપી (રેલ્વે પોલીસ) દ્વારા નોંધાયેલા ૮૩,૬૯૯ ગુનાઓમાંથી ૨૦,૫૧૯ ગુનાઓ એકલા મહારાષ્ટ્રમાં નોંધાયા છે.
દેશમાં નોંધાયેલા કુલ ૫૯,૫૨૧ સામાન ચોરીના ગુનાઓમાંથી ૧૯,૨૬૬ ગુનાઓ એકલા મહારાષ્ટ્રની રેલવે લાઇન પર બન્યા છે. મહારાષ્ટ્રમાં ટ્રેન મુસાફરી દરમિયાન હત્યાના કુલ ૧૧, બળાત્કારના ૬ અને મહિલાઓ અને બાળકો પર અત્યાચારના ૧૪૬ કેસ નોંધાયા છે. છેલ્લા કેટલાક વર્ષોમાં ઉપનગરીય ટ્રેનો અને રેલવે સ્ટેશનોમાં ગુનાઓની સંખ્યામાં વધારો થયો છે.
મહિલાઓ વિરુદ્ધના ગુનાઓની વાત કરીએ તો, મહારાષ્ટ્રમાં ૨૦૨૪માં છેડતીના ૬૧ કેસ, જાતીય સતામણીના ૪૫ કેસ, પીછો કરવાના ૧૧ કેસ, મહિલાઓ સાથે વિનયભંગના ૧૩ કેસ અને જાતીય ગુનાઓથી બાળકોનું રક્ષણ કાયદા સંબંધિત ૩૩ કેસ નોંધાયા હતા. આંકડા અનુસાર, મહિલાઓ વિરુદ્ધના ગુનાઓની સંખ્યામાં મહારાષ્ટ્ર પ્રથમ અને કેરળ બીજા ક્રમે છે.
જો કે, મહારાષ્ટ્રમાં અન્ય રાજ્યોની તુલનામાં કેટલાક ગંભીર ગુનાઓના આંકડા ઓછા છે. હરિયાણામાં હત્યા અને આત્મહત્યા માટે ઉશ્કેરણીના ગુનાઓની સંખ્યા વધુ છે. છેતરપિડીમાં આસામ મહારાષ્ટ્ર કરતા આગળ છે.
અન્ય ગુનાઓમાં, જાહેર રસ્તા પર અવરોધ ઉભો કરવાના કેસમાં ગુજરાત બાદ મહારાષ્ટ્ર બીજા ક્રમે છે. વિવિધ પ્રકારના ગુનાઓમાં પણ ગુજરાત ટોચ પર છે. શસ્ત્ર અધિનિયમ હેઠળ ઉત્તર પ્રદેશમાં સૌથી વધુ ૨૨૪ ગુના નોંધાયા છે, જ્યારે મહારાષ્ટ્રમાં ફક્ત ૧૨ ગુના નોંધાયા છે.
(10:02 AM IST)
છેલ્લા 8 દિવસમાં સૌથી લોકપ્રિય 
